Cabudaños de la transición

Esti fin de selmana fizo venti años que'l PSOE de Felipe González sacare la mayoría absoluta nes elecciones del 82 y tamién se cumplieron los 25 años de los nomaos "Pactos de la Moncloa". Si el cabudañu del trunfu socialista sirvió pa que'l PSOE escenificare ayeri la socesión de Felipe González a Zapatero nun actu de mases, el cuartu de sieglu de los alcuerdos ente les fuerces vives del réxime post-franquista y los partíos d'izquierda y sindicatos acabantes de llegalizar parez que pasó un poco de refilón. N'ochobre de 1977, l'estáu español y Asturies en particular, veníen de pasar l'añu más duru de fuelgues y conflictos llaborales de la historia más de recién, con paros históricos n'Asturies como'l del sector de la construcción. Los Pactos de La Moncloa, que se ficieron nun contestu de crisis económica y col gobiernu de la UCD entovía por asentase, celébrense güei como una amuesa de la capacidá de negociación ente fuerces que representaben a intereses estremaos y que punxo les blimes del cestu de la paz social, pero tamién dan pa una llectura crítica que los ve como un actu de combayonería y d'abandonu de les conseñes que defendía la izquierda, cola consecuencia añedía de cargar en llombu de les clases con menos recursos el pesu económicu de la situación.