Cabu Verde según Adolfo Camilo Díaz

El Director de Política Llingüística Ramón d'Andrés foi l'encargáu de presentar ayeri en Xixón la última novela d'Adolfo Camilo Díaz "Suañé con Cabu Verde" a la qu'asistió tamién Xuan Bello en representación de la casa editora, Ámbitu. L'autor, ganador en dos ocasiones del Premiu "Xosefa Xovellanos" de novela n'asturianu definió la novela acabante presentase como una obra de "susupense, con estilu sarcásticu y a vegaes humorísticu", y declaró tener la sensación de "ser siempre un estudiante,que quier cada día desixise más". L'autor allerán esplicó que la idea de la novela nació tres d'apadrinar una neña nicaragüense pa qu'una fia qu'acababa de tener tuviere una "hermana" diferente. Cuando recibió'l primer recibu del apadrinamientu l'autor declaró que-y dio un sentuimientu "asquerosu" y ello llevolu a da-y vueltes na cabeza al asuntu, saliendo d'ello "Suañé Cabu Verde" qu'arranca nel intre en que'l protagonista recibe una llamada diciendo-y que morrió la neña que tenía apadrinada.

Pela so parte, Xuan Bello sorrayó nel actu de presentación la preocupación del autor corveranu por facer una lliteratura "popular y que tenga inmediatez nel mensaxe" anque con too y con ello "anque ye una novela d'estilu popular tien muncho más de fondu" mientres que Ramón d'Andrés declaró que l'asturianu ye un pegoyu de la modernidá d'Asturies y punxo al autor como parte d'esi pegoyu. En cuantes al estilu, d'Andrés definió al autor de "Añada pa un güeyu muertu" como "una achapladora lliteraría con estilu que da bastiazos lliterarios, antidotu de la galbana que te sorprende ca poco".