Cabranes fai alcordanza de María Josefa Canellada

El Serviciu de Normalización Llingüística de la Comarca de la Sidra tien preparada pa esti vienres 16 una xornada d'homenaxe a la escritora y filóloga María Xosefa Canellada con motivu de los 25 años de la publicación de la so obra "Montesín", el primer llibru n'asturianu escritu pal públicu infantil. La conseyera de cultura Ana Rosa Migoya va asistir a los actos que van desarrollase en Conceyu de Cabranes.

Ente los actos principales d'esta conmemoración que va celebrase pal vienres qu'entra destaquen bien d'elles empobinaes pa la reciella, cola celebración de les "llectures montesines" pa rapacinos o una actividá d'animación a la llectura de la obra a cargu de la compañía KaamanteTeatru, actividaes que van facese a lo llargo de la mañana dende les 10. L'actu institucional a la una y media de la tarde, cola participación de l'alcalde de Cabranes Alejandro Vega y la Conseyera de Cultura Ana Rosa Migoya, va ser l'actu central de la xornada, y nelli va descubrise la placa que-y da'l nome de María Xosefa Canellada a la biblioteca y casa de cultura nueva de Cabranes. Pa pela tarde, una llectura pública de la obra a les cinco y media de la tarde cola participación de vecinos y autoridaes va dar pasu una hora dempués a una sesión d'estudiu sobre la figura de la escritora con comunicaciones sobre la so obra y una mesa-alderique cola participación del mayestru Severino Antuña, el director de Política Llingüística Ramón d'Andrés y el profesor de la Universidá d'Uviéu Xuan Busto Cortina.

Nacida nel Infiestu, Piloña en 1913, María Xosefa Canellada criose tamién en pueblu de Santolaya de Cabranes. Estudió Filosofía y Lletres na Universidá de Madrid y doctoróse en Filoloxía Románica con premiu estraordinariu. Profesora nes universidaes de Salamanca y de la New York University in Spain, foi tamién redactora del Diccionariu de la Real Academia Española y collaboradora del CSIC, siendo la filóloga asturiana más importante del sieglu XX. Comprometida cola recuperación de la llingua asturiana, Canellada participó na fundación de Conceyu Bable en 1975 y foi Academica de la Llingua Asturiana, manifestándose siempre a favor de la normalización del asturianu contra la opinión d'otros filólogos del so tiempu como Emilio Alarcos. Ente les sos obres de cabecera tanto n'asturianu como en castellanu destaquen Cuentos populares asturianos, la yá conseñada Montesín y tamién María, Mariantia y yo, últimu llibru qu'escribió enantes de dexanos nel añu 1995 a los 82 años.