Caberos díes pa votar nel Premiu al meyor cantar n'asturianu 2005

El próximu vienres día 20 de xineru a les 20:00 hores fina la primer fase del Premiu al meyor cantar n'Asturianu qu'entama esti diariu. Nesta primer fase n'Asturies.com tamos recibiendo milenta votos ente distintos cantares, pero rescamplen dellos que son los que de momentu tán nel tríu finalista. Corquiéu con "Llara", La Bandina con "Na Caleya" y "Internacionalista" de Skama la Rede son los trés cantares que van en cabeza, anque nun pueden descuidase un res porque tres d'ellos vienen con puxu otros cantares y grupos, como por poner un casu "Esnalar", cantar del últimu discu del Llangres que ta a mui pocos votos de metese nel tríu finalista.

Nes votaciones tamién rescamplen los cantares del discu "Salia" de Corquiéu, que tán recibiendo munchos sofitos, como espeya'l fechu de qu'amás de tener ente los primeros el tema Llara, el cantar "Ribeseyana" tamién tien el preste del públicu y puede algamar dalguna de les trés primeres posiciones. Un poco más p'abaxo topamos al Hip Hop de K-Nalón col tema "Comparte", que pelea por nun quedar p'atrás, lo mesmo que "Día del Ciclón" de Dixebra.

Asina les coses, d'equí al vienres inda pueden camudar les coses nesi tríu finalista, que va ser col que se faiga una votación al traviés de Conceyu Abiertu na segunda fase del premiu. Esta segunda fase va entamar el llunes 23, y a lo llargo de la selmana qu'entra va dase'l nome de los premiaos colos llotes de regalos que sortiamos nesta primer fase ente los participante nes votaciones.

Namás que nos queda qu'animar a toos aquellos qu'inda nun dieren el so votu por un cantar a que lo faigan, y que participen nel Premiu Asturies.com al Meyor Cantar n'Asturianu 2005, que cuenta col patrociniu de les cases de discos
L'AGUAÑAZ y
FONOASTUR, los locales
EL CAFÉ TRISQUEL y EL BARUKU,
l'asociación
ESCUELA
DE MÚSICA TRADICIONAL LA QUINTANA DE XIXÓNy la empresa
ARAZ NET.