La Foz de Morcín vivió ayeri'l día de la Fiesta del Quesu d'Afuega'l Pitu, ún de los exemplos de productos tradicionales asturianos que meyor tan adaptándose a los tiempos que cuerren anguaño y que xuben la so producción y entrada nel mercáu un añu tres d'otru, llegando nel 2005 a los 200.000 kilos vendíos poles ocho queseríes profesionales que trabayen el productu.
Nuna xornada fría enforma pero folixera y con públicu a esgaya que remató coles actuaciones de "La Bandina" y "Dixebra" les queseríes Llazana de Les Regueres y Ca Sanchu de Grau, qu'etiqueten dambes n'asturianu los sos productos, consiguieron los premios a los meyores productores profesionales, siendo pa la veterana quesería de Grau'l reconocimientu al meyor Afuega'l Pitu atroncáu y pa la de Les Regueres, qu'amás echó a andar esti añu, los premios al meyor Roxu de Trapu y al meyor Blancu de Trapu. Na categoría d'aficionaos ganaron en roxu de trapu Covadonga Martínez, de Morcín, en blancu de trapu la tamién morciniega Amparo Fernández y n'atroncáu Olga Suárez de Salas.
L'afuega'l pitu taba a primeros de los 80 nun procesu de decadencia ensin salir del círculu del consumu na redolada más allegada a los conceyos del centru d'Asturies onde se produz. El puxu de la industria artesana lleva yá más de dos décades ayudando a que l'Afuega'l Pitu tea faciéndose un güecu en mercáu, llegando a les baldes de los supermercaos y grandes superficies nun procesu aceleráu pola denominación d'orixe que llegó nel 2004. Sicasí, la supervivencia del sector nun ye fácil. L'accesu a la materia prima, el lleche, ye cada vegada más difícil nun contestu como l'actual en que la ganadería tradicional ta desapaeciendo nos conceyos onde se produz l'Afuega'l Pitu, y amás el preciu de los quesos lleva años cuasimente ensin variaciones, lo que fai que'l marxe de beneficiu mengüe, ello arreyao a los múltiples pilancos burocráticos a cumplir, siempre abegosos pa empreses de dimensiones familiares. La Conseyera de Mediu Rural Servanda García apuntó que'l futuru del sector pasa porque se concentre y qu'apaeza una gran empresa del Afuega'l Pitu. Por de pronto la tendencia ye la contraria, y ayeri anuncióse qu'otres cinco queseríes nueves tan en trámites p'abrir.