El Ca Beleño acueye la presentación de la revista ‘Asturies’ y un homenaxe al grupu Beleño

Programa completu d’actividaes esti vienres nel chigre uviedín Ca Beleño. Pela tarde va tener llugar la presentación del númberu 34 de la revista ‘Asturies. Memoria encesa d’un país’ y un homenaxe al grupu Beleño, y, yá de madrugada, l'actuación de l’arpista bretona Morgane Le Cuff.

A les 19.30 hores va celebrase la presentación del númberu 34 de la espublización, agora añal, de la Fundación Belenos, que vio la lluz en branu colos artículos siguientes: ‘Averamientu a la ecoloxía de los conceyos asturianos del Altu Navia’, de Fernando Montes García; ‘Una reflexón sol celtismu llingüísticu asturianu’, de Xosé Lluís García Arias; ‘Afayu d’una estela con decoración castreña n’Antrialgu (Piloña)’, d’Ástur Paredes, Daniel Cueli Canto y Alberto Álvarez Peña; ‘El guerreru durmiente’, d’Alberto Álvarez Peña; ‘El palu: un arma na tradición asturiana’, de Gausón Fernande Gutierri; ‘Catalogar pa protexer: el padremuñu etnográficu del conceyu de Cabrales’, de Diego Ruiz de la Peña Ruiz y Alberto Álvarez Uría; ‘El “Celta o Astur”, una escultura de Folgueras’, de Lluis Portal Hevia; y  ‘Cill Áirne: trenta años d’un viaxe iniciáticu a la verde Erín’,  d’Ignaciu Llope. La revista complétase coles sos estayes habituales ‘Memoria gráfica d’Asturies’, firmada nesta ocasión por Antón Álvarez Sevilla, que va ufrir imaxes y datos sobre les races autóctones asturianes inéditos nos sos trabayos anteriores, y ‘Cartafueyos de Belenos’.

Tres esti actu, va entamase un homaxe al míticu grupu Beleño con un conciertu nel que van participar Xuan Prado y Frankie Delgado, fundadores de la banda, xunto con Mapi Quintana, Alberto Ablanedo, Alberto Téllez, Pepín de Muñalén y Le Cuff. L’arpista bretona va protagonizar, a medianueche, una actuación nel mesmu llocal.