Cúmplense 206 años de la proclamación de soberanía de la Xunta Xeneral d'Asturies

El 25 de mayu del 1808, la Xunta Xeneral proclamóse soberana rebelándose contra les tropes franceses de Napoleón qu’invadieren el país. Ensin conmemoración institucional nenguna, la celebración coincide esti añu coles Europees.

La declaración de soberanía de la Xunta Xeneral llevó a la organización d’un exércitu asturianu propiu y al unvíu d’embaxadores a Inglaterra pa pidir sofitu na llucha contra l’exércitu francés invasor. Amás supunxo la creación de la bandera d’Asturies, similar a l’actual, que llevaba la cruz de la victoria y el lema ‘Asturias xamás vencida’.

L’Espaciu La Llegra, que promovió con ésitu un bloque soberanista d’izquierdes  na manifestación del 1 de mayu de los sindicatos de clase, na del Día de les Lletres Asturianes y na de les Asamblees de Trabayadores en Llucha, entama una concentración n’Uviéu pa conmemorar “esta fecha hestórica pal nuesu pueblu como ye la del llevantamientu popular del 25 de Mayu de 1808, tres el que la Xunta Xeneral declaróse soberana. Creemos que la falta de soberanía y de conocencia del potencial d'esti pueblu son delles de les razones que nos caltienen anguaño paralizaes y contra les cuerdes, mientres el poder políticu y económicu sigue esfarrapando'l país. Por eso una montonera persones a títulu individual, convocamos esta concentración y salimos a la cai esti sábadu 24 de mayu”. La cita ye a les 12.30 hores frente a la Xunta Xeneral, tien el sofitu de Compromisu por Asturies, Conceyu Abiertu y Darréu, ente otres formaciones y asociaciones, y ta divulgándose peles redes sociales baxo la etiqueta #lluchandopolasoberania y #asturiesexamasvencida.

Coincidiendo con esta fecha histórica pal país, Asturies.com recupera un artículu d’Alicia Laspra Rodríguez na revista 'Asturies. Memoria encesa d'un país', de la Fundación Belenos, sobre les rellaciones d’Asturies y Inglaterra demientres la Guerra d’Independencia. Otra manera, l'historiador Faustino Zapico va protagonizar el miércoles la charra-alderique '25 de mayu de 1808. Fechos y significáu' que va tener llugar a les 19 hores en La Manzorga (Carmen 20, Xixón).

ÚLTIMA HORA

La convocatoria de mañana foi cancelada por decisión de la Xunta Eleutoral, Delegación del Gobiernu estatal y Policía. L'Espaciu La Llegra convoca un conceyu a les 19 hores na sede la CSI n'Uviéu pa tratar y denunciar esti asuntu.