Cúmplense 204 años de la proclamación de soberanía de la Xunta Xeneral d'Asturies

El 25 de mayu del 1808, la Xunta Xeneral proclamóse soberana rebelándose contra les tropes franceses de Napoleón qu’invadieren el país. Esti vienres cúmplense, ensin nenguna conmemoración institucional, 204 años d’esa fecha.
 
La declaración de soberanía de la Xunta Xeneral llevó a la organización d’un exércitu asturianu propiu y al unvíu d’embaxadores a Inglaterra pa pidir sofitu na llucha contra l’exércitu francés invasor. Amás supunxo la creación de la bandera d’Asturies, similar a l’actual, que llevaba la cruz de la victoria y el lema ‘Asturias xamás vencida’.
 
Coincidiendo con esta fecha, Andecha Astur celebra n'Ovín (Nava) el XV Díi d’Andecha con un actu políticu y una espicha nel Llagar Alonso. Según esplica la formación nacionalista, los discursos van centrase “na necesidá inaplazable d’avanzar haza la xunidá d’aición del nacionalismu asturianu, cola esperiencia de Conceyu Abiertu comu espresión hasta la fecha más acertada del mesmu; asina comu’l procesu de reforciamientu de les cadarmes internes d’Andecha Astur cara al actual procesu d’acumulación de fuercies y de desendolcu d’estratexes de rempuesta a la llamentable situación socio-política que carez el pueblu asturianu”. Amás, nun comunicáu, aprovecha la conmemoración de la proclamación de soberanía de la Xunta Xeneral pa reclamar la necesidá que tien el país de contar “con un sistema xurídicu-políticu propiu y unes instituciones soberanes qu’unicamente respuendan a les necesidaes ya intereses de la sociedá asturiana y que per ende dean rempuesta a los nuesos problemes en clave asturiana y non española”.
 
Andecha Astur tamién ye ún de los siete coleutivos firmantes del manifiestu asoleyáu ayeri que reivindica’l 25 de mayu como una fecha histórica clave na historia del pueblu asturianu y que, al mesmu tiempu, denuncia l’escaezu sometíu por mor de “la manipulación histórica y l'esborramientu identitariu fechu demientres sieglos pol sucursalismu españolista”. Un escaezu que, entienden, nun ye por casualidá, sinón que “respuende a los intereses de les élites oligárquiques asturianes y del estatalismu español afitáu dientru y fuera d'Asturies”. El restu de organizaciones firmantes d’esti manifiestu son Bloque por Asturies-Unidá Nacionalista Asturiana (UNA), Bloque de la Mocedá Asturianista, Xunta Cultural Rebelgu, Axenda Alternativa Asturiana, Darréu y Asociación Cultural N'Ast.
 
Otra formación que nun escaez el 25 de mayu ye l’Ensame Socialista Astur. Nun comunicáu robláu pol so voceru, Pachu Llavandera Díaz, afirma que “consideramos el 25 de mayu una fecha hestórica, con un ampliu conteníu políticu, que forma parte irrenunciable de la historia d’Asturies, yá que somos una nacionalidá histórica que los poderes públicos nun quieren reconocer; siguen negando y reprimiendo con fuercia la nuesa historia como pueblu”. Pa celebrar la proclamación de soberanía de la Xunta Xeneral, la so militancia y simpatizantes van axuntase en Villaviciosa mañana pa celebrar una xunta nacional, xintar una fabada y tratar dellos temes políticos.
 
Concentración ‘Asturies Decide’
 
Mañana sábadu, a les 13 hores, ta prevista una concentración n’Uviéu baxo’l lema ‘Asturies Decide’ “pola defensa de les nueses instituciones, pol nuesu derechu a decidir, en conmemoración de la declaración de soberanía del 1808”. Ésta va celebrase frente a la Xunta Xeneral, que nesi momentu va tar celebrando la toma de posesión de Javier Fernández como presidente del país, actu que va principiar al meudía.
 
Otra manera, coincidiendo con esta fecha histórica pal país, Asturies.com ufre un artículu d’Alicia Laspra Rodríguez sobre les rellaciones d’Asturies y Inglaterra demientres la Guerra d’Independencia.