Cúmplense 20 años de la traxedia del Nicolasa

|

Tovía nun se conocen les causes que provocaron l’españíu que finó cola vida de 14 mineros, cuatro d’ellos checos. HUNOSA recuerda a los trabayadores del pozu mierense con un homenaxe.

Foi na madrugada del 31 d’agostu del 1995 cuando tuvo llugar l’accidente mineru más grave de los tiempos últimos. Alredor de les 3.15 hores, na capa octava del pozu, un españíu fuerte de grisú afeutó a un equipu de preparación que trabayaba nel llugar. Les consecuencies nun pudieron ser más graves: 14 d’ellos perdíen la vida, la mayor parte d’ellos nel actu, y namái dos consiguíen escapar de la muerte, Ángel Zabala y José Víctor Álvarez.

Les consecuencies de la traxedia pronto conociéronse en tola redolada, provocando una desolación enorme en tola cuenca’l Caudal y n’Asturies. Familiares de trabayadores averáronse al llugar cola esperanza de que nun se confirmaren los peores presaxos. Finalmente, tres más d’ocho hores de tarees de rescate, la llista prieta de trabayadores que se cobró la mina tuvo formada polos asturianos Eugenio Martín, Francisco Javier González Merino, José Ignacio del Campo, Juan Manuel Alvarez Fernández, Eduardo Augusto Alves, Elías Otero, Manuel Angel Fernández Bueno, Anatolio Lorenzo y Luis Antonio Espeso, y los checos, contrataos por una subcontrata, Viastimil Havlik, Miroslav Divoky, Michal Klenot y Milan Rocek.

Un cambiu drásticu nes midíes de seguridá

La creación d’una comisión d’investigación del accidente na Xunta Xeneral nun sirvió pa dar pistes sobre les causes del españíu de grisú, dalgo qu’enfrentó a empresa y sindicatos. Comisiones Obreres (CC OO) señaló a unes chispes provocaes pola máquina estractora del carbón, mientes qu’HUNOSA entendía que la razón posible yera unes chispes xeneraes pol electroventilador. Mentes, dende’l Gobiernu apuntaron a un españíu de dellos cartuchos de dinamita. Lo cierto ye que, 20 años depués, tovía nun se conocen les razones de la última gran traxedia de la mina n’Asturies que, sicasí, siguió cobrándose vides nos años siguientes. Una fería entovía por zarrar por familiares y compañeros de los trabayadores finaos.

Sicasí, l’accidente del pozu Nicolasa provocó un xiru de 180 graos nel esmolecimientu d’HUNOSA en materia de seguridá. Asina, hebo inversiones mayores pa detectar el grisú nes mines asturianes y una modificación nos métodos de trabayu pa minimizar la posibilidá d’accidentes, sobre manera cola introducción de medios mecánicos.

Homenaxe a los 14 trabayadores

Con motivu del venti aniversariu del sucesu, HUNOSA entamó esta mañana un actu d’homenaxe na plaza del pozu asitiáu n’Ablaña, entovía activu, al que convidó a los familiares de les víctimes. Ésti consistió nel descubrimientu d’una placa en recuerdu a los 14 trabayadores que perdieron la vida’l 31 d’agostu del 1995.

Contador Estadistiques