Cádaba ufre en Tapia un conciertu del ciclu ‘Conceyos de Cantares'

Cádaba va actuar esti xueves en Tapia dientro del ciclu de conciertos que los grupos participantes nel CD ‘Conceyos de Cantares’ tán ufriendo pel Parque Históricu del Navia. Les actuaciones coinciden con celebraciones festives llocales.
 
Esta iniciativa de los conceyos del Parque Históricu del Navia y de la Oficina de Coordinación Cultural y Llingüística de la Fundación Parque Históricu del Navia, que principió’l día 8 d’agostu, continúa esti xueves cola actuación de los franquíos Cádaba en Tapia na XIX Feria Campomar. Ésta va dar entamu a les 22.30 hores. Tres esti conciertu, Cádaba va repetir actuación el 3 de setiembre n’Eilao nel Día de Campu de Folgueiróu, y el 24 d’esi mesmu mes na quincena cultural d’A Caridá.
 
Los otros dos grupos participantes nesta iniciativa son los bualeses Mezá y Tuenda. Los primeros tienen previsto actuar na Festa del Viño de Pezós el sábado 15 d’ochobre, y la banda d’Ambás el 16 de setiembre na Festa de los Dolores de Villayón y el 29 d’ochobre na Feria del Mel de Bual. Esti ciclu de conciertos tán cofinanciaos pola Conseyería de Cultura y los conceyos del Parque Históricu del Navia.