Buznego llevóse’l premiu a la meyor sidra del festival de Xixón

Sidra Buznego, llagar con instalaciones n’Arroes, llevóse’l ‘Eloxu d’oro’ a la meyor sidra de la XXI Fiesta de la Sidra Natural de Xixón. Mentes, el xuráu del públicu escoyó a Sidra JR como la so favorita ente los 22 participantes.
 
El domingu yera’l ‘Día de la sidra natural’ de la Fiesta de la Sidra Natural de Xixón, o lo que ye lo mesmo, el día grande d’esta celebración que como novedá tuvo dos díes más de duración que n’ediciones anteriores. L’actividá principió al meudía na Plaza Mayor cola entrega al llagareru José Tomás, de Sidra Tomás, del ‘Tonel d’oru’ pola so trayeutoria nel mundu de la sidra, pa depués dar entamu a la preba nos puestos instalaos nel llugar y na Plaza’l Marqués. Nesta ocasión Julián Castañón (Sidra Castañón) y Gerardo Menéndez (Sidra Menéndez), representantes de los llagares ganadores del ‘Eloxu d’oru’ y del ‘Premiu del públicu’ del 2011, de manera respeutiva, echaron el primer culín de la folixa.
 
Al igual que l’añu pasáu, la preba celebróse namái pela mañana, midida poco popular que dexó en namái 2.200 los llitros de sidra que se bebieron na Fiesta de la Sidra Natural. Alredor de les 14 hores diose a conocer al ganador del ‘Premiu del Públicu’ d’esti añu, que se quedó otra vuelta en Xixón. Sidra JR foi la que más convenció al xuráu popular conformáu por 25 persones. Mentes, el ‘Eloxu d’oru’, otorgáu por espertos, viaxó a Villaviciosa, en concreto a Arroes. Sidra Buznego llevóse’l gallardón d’una de les fiestes más importantes del mundu de la sidra trés llustros depués.
 
Estos premios nun foron los únicos que s’otorgaron a lo llargo de la selmana nes muches actividaes entamaes polos organizadores de la Fiesta de la Sidra. Asina, Javier Canteli Rodríguez, de Fuentes (Villaviciosa) llevóse’l Concursu de Sidra Casera, siendo’l primeru de Xixón Eduardo Alcaráz Pérez, vecín de Caldones. El chigre ganador del premiu ‘Ties que dir a…’, a la considera pol públicu como la meyor sidería del conceyu, foi l’Uría (Alfonso Camín, 26). Mentes, los gallardones del Mercadín de la Sidra y la Mazana recayeron n’Acebache de Llantones (Al puestu más prestosu), Les Camisetes (A la mercancía meyor presentada) y Sentir el Chocolate (Al productu más novedosu pola so ‘tartaleta de pasta sablé salada con cabrales y manzana’).
 
Récor d’escanciáu nuevu
 
7.883 persones contribuyeron el vienres a superar el récor mundial d’escanciáu simultaneu de sidra, lo que suponen 307 más que l’añu pasáu. La sablera d’El Natahoyo convirtióse otra vuelta nuna folixa na que nun faltaron les tortielles y les empanaes, y, sobre manera, les ganes de diversión. Tamién tornaron a ser un ésitu los cantarinos de chigre del sábadu, que dexaron pequeña un añu más la Plaza Mayor de Xixón.