Busquen a los desapaecíos de la guerra

Va delles selmanes, L'Asociación pola Recuperación de la Memoria Histórica, que ta faciendo campañes d'identificación de desapaecíos na Guerra Civil, anunció qu'entamaba llabor n'Asturies pa iguar la inxusticia histórica que supón la "non esistencia" de los represaliaos al nun apaecer los sos cuerpos. La Sociedad Cultural Xixonesa y l'Atenéu Obreru de Xixón, que tien publicaos dellos estudios sobre la represión qu'hubo nos años de depués de la guerra, collaboraron con esta asociación na recoyida de fiches de desapaecíos asturianos na Guerra Civil. El resultáu de la campaña de trabayu ye que l'Asociación va entamar darréu a escarbar en busca de desapaecíos en delles foses comunes que yá tien atopaes y de les que tien abonda información n'Avilés, Pravia, Grau, Teberga y el Monesteriu de Valdediós en Villaviciosa.