“Busco una conseyería cercana que se base na escucha activa y la empatía”, afirma Espina na toma de posesión

La conseyera d’Educación nueva, Lydia Espina, tomó posesión del so cargu esti xueves enantes de la celebración del Conseyu de Gobiernu. “Busco una conseyería cercana que se base na escucha activa y la empatía”, aseguró la maliaya, que sustitúi nel cargu a Carmen Suárez.

“Empiezo con munchísima ilusión y brindo diálogu a tolos sectores educativos, sindicatos, families, asociaciones, profesoráu, alumnáu, conceyos y a toes aquelles persones que lo precisen. Les mios puertes tán abiertes y les del equipu que se conforme tamién lo tarán”, confesó. Tuvo pallabres tamién pa la so predecesora, a la qu’agradeció “el so trabayu y el so llabor fechu nesti tiempu tan difícil, na mio opinión el más difícil vivíu na educación asturiana”.

Espina, qu’hasta agora ocupó’l cargu de direutora xeneral de Planificación y Infraestructures Educatives, aseguró que “busco una conseyería cercana que se base na escucha activa y la empatía”. Ente los sos oxetivos pa estos dos años que queden de llexislatura citó l’aseguramientu de la presencialidá nos centros nestos tiempos de pandemia, l’informar “en tiempu y forma” a la comunidá educativa de “les decisiones que se vayan tomando”, la dixitalización “como una exa vertebral de la nuesa comunidá”, la potenciación de la Formación Profesional (FP) y l’ampliación y reforzamientu de la rede de 0 a 3.

Na imaxe, Espina y Suárez, conseyera entrante y saliente, de manera respeutiva. Semeya obra d'Armando Álvarez.