Burgos 0 - Sporting 0

Cola permanencia asegurada y l'ascensu a ocho puntos, el Sporting tenía que salir a comer al Burgos, pero los d'Acebal ficieron ún de los partíos más sosos del añu p'acabar empatando a ceros col mediocre Burgos del ex-sportinguista Tcherishev, que foi l'únicu que se molestó en tirar dacuando a portería.El partíu foi de lo más tristayo, y nengún de los dos equipos s'atrevió a tirar del carru, consumiéndose'l tiempu en peloteos nel centru'l campu y fallos nos pases. Yá de mano viose que nin Burgos nin Xixón teníen calidá abondo pa ufiertar un partíu curiosu, pero polo menos el Burgos fartose a sacar córneres na primer parte, ufiertando lo poco qu'hubo d'ataque en tol partíu. Nel Sporting lo meyor foron los tres mil aficionaos que marcharon hasta Burgos y que nun merecíen ver un alcuentru tan malu, xunta pablo Amo. El defensa del Sporting torgó tolos intentos del ataque local, anque nel últimu minutu un fallu de Valencia dexó una oportunidá curiosa pal Burgos que falló Merino. La única ocasión del Sporting vieno tamién a lo cabero'l partíu, cuando Villa, acosáu pola defensa burgalesa tola tarde, acertó a da-y un balón morrocotudu a Michel que'l xigante nun supo aprovechar y qu'acabó tranquilamente en manes del porteru del Burgos.