Buendia xustifica'l sobrecoste del Musel

El conseyeru d'Infraestuctures, Política Territorial y Vivienda, Francisco González Buendía, anunció güei na so intervención na Xunta Xeneral del Principáu que los ifnromes favorables emitíos pol Estáu en relación al modificáu de les obres d'ampliación del puertu d'El Musel, avalen dichu modificáu, "utilizando los mesmos términos emplegaos" por él mesmu na so primer intervención.

Buendía y el presidente de l'Autoridá Portuaria de Xixón, Fernando Menéndez Rexach, declararon ayeri na Xunta Xeneral del Principáu por pidimientu de los grupos parlamentarios PP y IX-BA-LV. El conseyeru ya lo ficiera'l pasáu 12 de payares, pa tratar el mesmu asuntu.

Per una parte'l conseyeru refirióse al informe técnicu de Puertos del Estáu y per otra al informe xurídicu de l'Abogacía del Estáu, dambos na so opinión "suponen un importante respaldu a la xestión llevada pol Puertu d'El Musel a la vez qu'abre la puerta a la solicitú de nueva financiación de la Unión Europea".

"L'aprobación a nivel estatal d'estos informes ye positiva y confirma'l compromisu del Estáu cola ampliación del puertu", dixo'l titular d'Infraestructures, que reiteró que los "informes coinciden y acepten los argumentos y esplicaciones daes nel Parlamentu como causa y xustificación de los aumentos de coste.

Sobre les causes del aumentu de coste, el conseyeru volvió a esplicar que con posterioridá a l'axudicación de la obra, evidencióse la imposibilidá material d'usar canteres que demientres la fase de negociación incial del proyectu fueren comprometíes y teníes en cuenta pa la ellaboración de precios. Per un parte HC, al proceder a la instalación d'una planta de sulfuración, nun permite la esplotación de la cantera comprometida d'Aboño hasta marzu del 2007, y per otra parte, nun s'algamó la llicencia d'apertura de la nueva cantera de Perecil, lo que motiva que la UTE tenga necesidá de trayer escolleres y pedraplanes de canteres comerciales d'Asturies y Llión. L'aprovisionamientu de materiales ye la mayor causa del aumentu de coste.

Dicho esto, insitió en qu'él nun fizo a naide responsable de les ampliaciones de presupuestos. "Nun fice responsable a naide, son pallabres testuales, tolo añadío al respecto ye ayenu a les míes pallabres. Yo reafírmome nestes esplicaciones", dixo Buendía, qu'insistió en que convién destacar que "nesti momentu l'ampliación de presupuestu xube a un 12%, ye dicir 62 millones d'euros y non 216". Insistió en que los ciudadanos nun se van ver afectaos por estos aumentos y que tampoco van modificase les tarifes del puertu. "El puertu autofinánciase, a los xixoneses y asturianos nun-yos va costar nada", insistió'l conseyeru.

Reiteró no relativo a les responsabilidaes y competencies, que ye responsabilidá del Gobiernu d'Asturies la orientación de la política portuaria de la comunidá, asina como l'impulsu de l'ampliación del puertu, pero non la materialización d'esta obra política.

Pela so parte, Menéndez Rexach, asumió la esplicación de Buendía sobre les causes de los aumentos de coste y ofreció datos más concretos sobre los mesmos en cuantes a feches y cifres.