Buendía reconoz qu’hai balses de residuos tóxicos n’Asturies

El Conseyeru de Mediu Ambiente, Francisco González Buendía, reconoció que n’Asturies hai seis balses de residuos tóxicos. Estos datos son el resultáu d’una pregunta del diputáu del BA, Roberto Colunga.

De les seis balses de residuos tóxicos reconocíes pol conseyeru, cuatro alcuéntrense nel Conceyu de Castrillón y pertenecen a la empresa Asturiana de Zinc S.A. Les otres dos tán en Balmonte, na localidá de Bueinás y baxo la empresa Kinbauri España S.L.

La Conseyería tamién reconoció qu’una de les balses d’Asturiana de Zinc ta averada al Ríu Raíces, yá cerca de la so desaguada y otra de la esplotación de Beuinás, alcuéntrase nuna fastera averada al Río Cauxía.

“Estos datos son esmolecedores viendo los precedentes que se viven con esti tipu d'instalaciones y que tán recién como nel casu d'Hungría”, señalaron dende’l Bloque por Asturies. Amás, la formación nacionalista sorrayó que les balses de Bueinás son “4’7 vegaes más grandes caúna d’elles que les de la catástrofe d’Hungría”.

Esmantelamientu
Dende’l BA pidieron “l’esmantelamientu inmediatu” d’estes balses por mor del “riesgu que suponen col pasu de los años”. Tamién indicaron que agües como les del ríu Cauxía “sufren  problemes de contaminación y en casu d'accidente afectaría al ríu Narcea  y a la economía agrícola de la zona de Curniana y Pravia, que llevaría a la ruina”.