Bruxeles paralizará’l rescate a la banca española si’l Gobiernu incumple los axustes esixíos

|

L’Estáu español alcordó’l sábadu col Eurogrupu un rescate d’hasta 100.000 millones d’euros pa la banca. Bruxeles podrá paralizalu si’l Gobiernu incumple los requisitos de mengua del déficit y les reformes esixíes pola Comisión Europea.
 
El plan d'ayuda va llevar apareyaes una serie de requisitos, que tovía tienen que negociase, centraos nel conxuntu del sector bancariu y non namás nes entidaes rescataes. Pero amás, la Comisión y los países de la Eurozona van vixilar que l’Estáu español prosiga coles reformes y axustes encamentaos por Bruxeles, según esplicaron fontes comunitaries, ente los que destaquen, amás de la mengua del déficit, la xuba del IVA, la eliminación de  la deducción por vivienda o’l retrasu de la edá de xubilación. “Ye una ayuda suxeta a condiciones y que va revisase de manera regular por aquellos qu'empresten l'asistencia", indicaron les fontes consultaes. "L'Eurogrupu tien la posibilidá de certificar que se dan les condiciones pa siguir emprestando esta asistencia o non", añadieron. Ello ye que l'adopción de midíes eficaces pa correxir de forma acelerada los desequilibrios nes cuentes públiques ye un "prerrequisitu" a la hora d'acceder a ayudes del fondu de rescate pa la banca. Los estaos de la Eurozona constataron el sábadu que l’Estáu español cumple esta condición y, por ello, tán dispuestos a conceder l'ayuda, pero van caltener la vixilancia mientres tol procesu.
 
Amás, la Comisión, cola collaboración del Bancu Central Européu (BCE), l'Autoridá Bancaria Europea (EBA) y el Fondu Monetariu Internacional, va presentar al Eurogrupu informes periódicos sobre la marcha de la reforma financiera. Si se detectara cualquier incumplimientu nesta área, l'ayuda tamién va poder cancelase. Les condiciones que van imponese al sector financieru van basase, en primer llugar, nes regles de la Xunión Europea (XE) sobre ayudes públiques. Estes regles supediten cualquier ayuda pública a un plan que garantice la viabilidá futura de cada entidá y obliguen a baxar la talla de los bancos beneficiarios, por exemplu per mediu de la venta d'activos, pa llendar les distorsiones de competencia. Pero tamién van establecese requisitos pal conxuntu del sector en materia de tresparencia y supervisión. "Trátase de llimpiar el sector bancariu español nel so conxuntu, inyectando tresparencia y eficacia", señalen les fontes. "Va haber qu'encarar cuestiones como l'adopción de riesgos escesivos", añaden.
 
Bruxeles espera que'l Gobiernu estatal presente, "en breve", la solicitú oficial de rescate bancariu. A partir d'esi momentu va facer otru analís del sector pa determinar les sos necesidaes exautes de capital y va realizar una propuesta de condiciones que tien qu'aprobase por unanimidá nel Eurogrupu.

Contador Estadistiques