Brutalidá policial en Barcelona pa desallugar a los indignaos acampaos en Plaça Catalunya

La celebración posible del títulu de Lliga de Campeones del Barcelona’l sábadu na zona de Plaça Catalunya y Canaletes llevó a los Mossos a intervenir na acampada de la capital condal. La escusa policial yera dexar entrar a los servicios de llimpieza.

 

La policía autonómica catalana llegó a les 6.50 hores cola intención de desallugar el campamentu pa llimpialu d’oxetos contundentes y pelligrosos con motivu de la posible celebración del títulu de Lliga de Campeones por parte del Barcelona na final de mañana en Wembley ante’l Manchester United. Ello suponía quitar tola infraestructura creada polos acampaos nestes casi dos selmanes La zona de Plaça Catalunya y Canaletes ye’l llugar de concentración habitual de l’afición culé na celebración de títulos, eventos nos que ye habitual qu’haya disturbios. Los Mossos señalaron a los acampaos la posibilidá de, una vegada finalizada la llipieza de la plaza, tornar a ella namái con sacos de durmir, pero la idega nun convenció a los indignaos que, pa intermediar cola policía autonómica, convocó al bufete d’abogaos Legal Team.

 

La llegada de los Mossos provocó un efectu llamada ente los manifestantes, que nun apararon de llegar a la Plaça Catalunya nuna situación que principiaba a dise de les manes a la policía. Entós propunxeron a los acampaos qu’ocuparen la metá de la plaza mientres llimpiaben la otra, pa depués facer la mesma operación na otra metá. Los 300 indignaos que taben nel centru de la plaza trataron el tema n’asamblea rodeaos d’efeutivos policiales y decidieron qu’ellos mesmos diben facer la llimpieza de la zona, pero que primero los Mossos debíen dexar entrar a la xente que taba fuera del cordón policial y qu’ellos colaren del llugar.

 

La reacción policial, como pueden vese nes imáxenes recoyíes polos presentes y por cadenes de televisión como Antena 3, foi escesiva, yá que cargaron contra homes y muyeres sentaos en suelu de forma pacífica provocando, al menos, 66 feríos. El movimientu d’indignaos que tán acampaos en places de tol Estáu tán convocando manifestaciones de protesta a les 19 hores de güei polo que ta asocediendo en Barcelona.