‘Bruno’, el primer temporal del iviernu, dexa raches d’aire d’hasta 130 quilómetros per hora

|
Asturies alerta 27 d'avientu Bruno

Agua, raches d’aire d’hasta 130 quilómetros per hora, nieve y folaxe fuerte ta dexando ‘Bruno’ n’Asturies. El primer temporal del iviernu caltién n’alerta mariella’l suroccidente y el cordal por nevaes, mentes que tol llitoral tien avisu naranxa.

‘Bruno’ aportó ayeri a Asturies dexando delles incidencies en tol país, como la cayida d’un árbol sobre L’Escorialín, edificiu d’información turística del uviedín Campu San Francisco, que quedó estrozáu. Problemes cola decoración navidiega en Xixón y l’esbarrumbe por causa del aire del techu del edificiu del Complexu Deportivu La Toba, en Llaranes, foron dalgunos de los más destacaos.

Lo peor de ‘Bruno’ yá pasó, pero entovía va dexar buelga na mar, y nel suroccidente y tol cordal en forma de nieve, según informa l’Axencia Estatal de Meteoroloxía (Aemet). Mañana l’alerta namái va caltenese nel llitoral oriental por fenómenos costeros, nesti casu de categoría naranxa.

Ocho puertos con cadenes

A les 14 hores de güei yera obligáu l’usu de cadenes en nueve puertos de la rede asturiana de carreteres: San Isidro, Ḷḷeitariegos, El Counio, Tarna, Zarréu, Somiedu, San Ḷḷorienzu y Ventana. Mentes, tamién son necesaries pa circular pela AS-264 de Sotres a Cantabria, tando zarrada la LN-8 nel tramu de Tuíza al puertu de La Cubieḷḷa.

Pue consultar l'estáu de les carreteres asturianes al momentu calcando nesti enllaz.

Contador Estadistiques