Brasil nun ye la única campeona

El mundial de fútbol de Corea y Xapón acabó ayeri con Brasil ganándo-y la final a la selección alemana. La semeya de los ganadores deportivos y de la torcida brasileña celebrándolo son güei portada en tolos medios. Sicasí, la canarinha nun ye la única ganadora del mundial, porque pa les 15 grandes multinacionales que patrocinaben l'acontecimientu, xunta los gobiernos de los estaos anfitriones, el trunfu igual ye más calláu, pero tamién rinde más que pa los deportistes.Al día depués d'apagase los focos del estadiu de Yokohama, los responsables de les marques de material deportivu, los amos de les televisiones y les cases d'apuestes echen cuentes y concluyen entusiasmaos que pagó la pena la inversión. Esti mundial dio más perres que'l de Francia va cuatro años, confirmando lo que yá suponíen enantes de que'l balón entamare a rodar. Nin siquiera les fuelgues nes empreses coreanes menguaron los beneficiosos efectos de la Copa Jules Rimet na economía nacional. Les marques de ropa, como Adidas, tamién anuncien que-yos cuadren les cuentes, anque igual los más beneficiaos seyan los que controlen el negociu de les apuestes, qu'amás tienen una mina pa esplotar nes apuestes on-line. Y ye que, penriba d'otres consideraciones, esti foi el primer mundial d'internet.

Contador Estadistiques