Braga: “Toi mui contentu cola esperiencia de dar clase na UABRA”

El músicu Héctor Braga Corral (Llangréu, 1980) debutó como profesor de la UABRA nesta edición. Impartió clases nel cursu ‘Cantares, bailles ya instrumentos musicales asturianos' y marcha de Cangas del Narcea satisfechu pola esperiencia.

 

 

Di seis hores de ‘Organoloxía Tradicional Asturiana. Instrumentos tradicionales asturianos. Orixe, evoloción, carauterístiques y práutiques’ y toi mui contentu col so desarrollu. La xente tien munches ganes d’aprender, sobre too porque los conteníos son asturianos, conteníos que nos toquen cultural y musicalmente, y que yá sabemos que desgraciadamente nun tán impartíos nesti casu nos currículos musicales qu’hai n’Asturies. Ye dalgo que queda mui en criteriu del mayestru –toi falando del Conservartoriu–, por eso esti cursu ye específicu sobre’l tema de la organoloxía tradicional asturiana.

 

 

Ye mui bayorosu porque hai xente que ye mayestra de Primaria, tamién d’Infantil; hai xente de Secundaria, menos; y otra que cenciellamente bien a aprender. Polo tanto, hai xente de tolos niveles y de toles edaes, dende mayores de 50 años a mozos de 20.

 

 

Hai dalgunos que sí saben de música, pero otros non. Si esti tipu d’enseñances tuvieren regularizaes yo tendría esti cursu más organizáu: tendría xente que sabe, per un lláu, y xente que nun sabe, per otru. Esa ausencia d’enseñanza sistematizada fai qu’equí venga’l que ta interesáu, tenga los conocimientos que tenga.

 

 

Ye fundamental el llabor de proyeiciones, sobre too pal tema teóricu, porque hai que falar d’oríxenes, de feches, d’iconografía… Cuando quiero falar del orixe de la gaita tengo que poner diapositives de cómo yeren nel sieglu XIII, cuando tenemos les primeres referencies visuales de gaita n’Asturies. Llueu tamién ye perimportante’l tema visual, cuando hai videos; el tema sonoru; y el tema práuticu. Yo traigo bastantes instrumentos a clase que los alumnos manipulen y, en dalgunos casos, toquen tamién.

 

 

La suerte d’esti tipu de cursos ye que la xente vien a aprender, nun tán obligaos polos pas, como ye’l casu del institutu o del colexu, y eso nótase porque tien voluntá de conocer, de saber, y eso a un docente ye lo meyor que-y pue pasar.

 

 

Anguaño toi faciendo la tesis doctoral na Universidá d’Uviéu y la oportunidá surdió porque’l mio direutor de tesis coordina la parte musical de la UABRA. Yo tengo dos perfiles: ún ye l’artísticu, el profesional, pero per otru llau ta l’académicu, yá que tengo dos carreres musicales, un máster y anguaño toi faciendo’l doctoráu. Entós diose l’allininiamientu de planetes necesariu pa que viniera equí de docente y la verdá ye que toi mui contentu cola esperiencia. Como toma de contautu ye mui bona y yá inclusive pienso coses que, si ye posible, gustábame tresmitir a la organización pa qu’arriquecieran les materies y que’l crecimientu fuera continuu, dalgo perimportante dada la situación social que tenemos n’Asturies nel tema d’enseñances rellacionaes col asturianu, tanto llingüístiques como musicales, yá sía en conservatorios o aules de música de Primaria.

 

 

Va haber daqué especial. Hai xéneros habituales –nunca me presta repetir los mesmo temes, pero sí los xéneros–: romances, xácares, asturianaes... Y, como siempre, bayura d’organoloxía, con gaita, bandurria, gaita rabil… El públicu sí va atopar coses especiales porque quiero facer una pequeña muestra del trabayu que toi desendolcando agora y que consiste en nueves lletres na asturianada, nes melodíes asturianes. Y aprovechando que tengo bastantes creaciones lliteraries de poetes, feches de manera espresa, voi tocar dos o trés temes d’esi xeitu.