Botelles, bolses y palos de llambiotaes son la basura que más empuerca los ríos asturianos

Más de 130 voluntarios participaron na convocatoria del proyectu Libera pa llimpiar les riberes.

El resultáu de la última campaña ‘1m2 por los ríos, lagos y embalses’, del proyectu Libera, impulsáu pola Sociedad Española de Ornitología (SEO-Birdlife) y Ecoembes, foi la recoyida de 441 residuos diferentes namás n’Asturies. Los más de 130 voluntarios tuvieron a la gueta n’once puntos de los conceyos de Tapia y L.lena ente’l 12 y el 20 de marzu.

Asina, ente la ‘basuraleza’ más atopada nes riberes fluviales asturianes destaquen, de primeres, botelles de bebida, seguíes de bolses, envoltorios y palos de llambiotaes, y bolses de la compra. Les persones que participaron na recoyida, emplegaron una aplicación móvil nomada ‘eLitter’, cola que fueron identificando cada restu alcontráu. Esta ferramienta de trabayu pionera ta desarrollada poles asociaciones Paisaje Limpio y Residuos Cero, en collaboración con Libera.

Los datos recopilaos van ser parte d’una base de datos del Ministeriu pa la Transición Ecolóxica y Retu Demográficu, sumándose a los oxetos yá retrataos nel ‘Barómetru de la Basuraleza’ d’esti proyectu. “Gracies al esfuerzu de miles de persones sabemos la tipoloxía de los restos qu'acaben nos nuestros ríos y déxanos poner el focu na prevención y la conocencia” aseguró Sara Güemes, coordinadora del proyectu Libera n'Ecoembes.

Nesta quinta edición d’esta campaña recoyéronse dafechu seis tonelaes de basura en toa España, con más de 5.800 persones voluntaries en 370 puntos del territoriu. “Nestos momentos tan delicaos tenemos que ser firmes na defensa del nuesu patrimoniu natural. Espacios naturales sanos son el nuestru verdaderu patrimoniu, les nueses verdaderes reserves”, esplicó Miguel Muñoz, coordinador del proyectu Libera en SEO/BirdLife.