Bono quier un llíder "moderáu" pal PSOE al que nun-y dea vergoña glayar “¡viva España!”

José Bono declaró que quier un llíder “socialista moderáu” al que nun-y dea vergoña glayar “¡Viva España! al zarrar el congresu del que salga escoyíu”. El PSOE ta en procesu de renovación tres el fracasu eleutoral del 20-P.
 
A xuiciu del presidente del Congresu, la persona encargada de lliderar el PSOE nun debe tener “complexos de territoriu, d'edá nin de clase” y que, tal como fixo’l secretariu xeneral de los socialistes portugueses, Antonio José Seguro, al glayar un ‘¡viva Portuga!’, faiga lo mesmo al entender que “nun ye un glayíu de la derecha nin del franquismu”. Bono entiende que la persona adecuada pal puestu ha de ser un socialista "moderáu" y non un "dogmáticu" que se crea en posesión de "tola razón"; una persona dispuesta a buscar la razón "con aquellos que discrepen". "Un español ensin complexos", reclamó en declaraciones feches nel Congresu tres sorrayar que nun ye "momentu de reproches nin d'axustes de cuentes" nel senu del PSOE, ente otres coses, porque les eleiciones perdímosles "tolos" socialistes.
 
Entrugáu sobre si un dirixente del PSC podría llanzar esi glayíu qu'él defende –en clara referencia a Carme Chacón–, Bono llamentó que los socialistes catalanes "lleven demasiao tiempu diciendo que nun son el PSOE" y apuntó que "sería bueno escucha-yos dicir que pertenecen" a él. “¿Pue ún ser presidente del PSOE ensin formar parte d'él?", llanzó darréu, contestando que ye "evidente que non". "¿El PSC forma parte del PSOE?", continuó, pa depués señalar qu'él siempre creyó que sí, anque "dalgunos de los sos militantes esforzáronse muncho nos últimos años en demostrar que non".