Bodegas Oubanca saca a la venta l’añada 2010 del vinu Ḷḷumés

L’añada 2010 del vinu Ḷḷumés, el primeru etiquetáu en llingua asturiana, yá ta a disposición de los aficionaos a esta bébora. Inscritu na IXP Vinu de Calidá de Cangas, esti caldu de Bodegas Oubanca ye ún de los más demandaos de la zona.
 
La empresa familiar Bodegas Oubanca, asitiada nel conceyu de Cangas del Narcea, torna a apostar por esti vinu fechu cola variedá autóctona verdéu tintu que foi un ésitu de ventes na so primer collecha, del 2008. La repercusión qu’algamó por ser el primer vinu etiquetáu dafechu na nuesa llingua y la so calidá provocó una demanda alta, inclusive de puntos de fuera d’Asturies, como Cantabria, escosándose en pocos meses. Agora, esta segunda añada tien tola pinta de siguir el mesmu camín.
 
Les persones interesaes en facese col Ḷḷumés, vinu con una graduación d’un 13 por cientu que madura nueve meses en barrica de carbayu francés, han d’acudir a tiendes especializaes, a la propia bodega o encargalu al traviés de la distribuidora Punto en Boca. La puesta en marcha d’esti proyeutu por parte de Bodegas Oubanca, que trabaya na ellaboración d’un Ḷḷumés blancu con una variedá albillo, permitió-y conseguir n’avientu’l Pegollu de los XXVII Premios Andrés Solar, convocaos pola Xunta pola Defensa de Llingua Asturiana, pol "so apueste pioneru pola visibilización y normalización del asturianu nun sector productivu y comercial emblemáticu d'Asturies".