Bluesky recibe una propuesta pa incorporar la llingua asturiana

Iniciativa pol Asturianu contautó con esta rede social de mensaxes curtios pa que sume l'idioma a los munchos qu'ufre, ente ellos l'aragonés.

Conocida como una de les meyores alternatives a la cada vez más criticada X –enantes Twitter–, Bluesky rescampla por tener una mayor sensibilidá llingüística: cuenta con una amplia llista d'idiomes pa escoyer y da la posibilidá de seleicionar cuál s’utiliza a la hora de facer una publicación p'ayudar asina a categorizar los diferentes testos espublizaos na páxina. Dellos usuarios de la rede social yá fixeron llegar a la empresa pidimientos pa la incorporación del asturianu, pasu que tamién dio Iniciativa pol Asturianu de manera formal.

Con esta propuesta a la plataforma social Bluesky, a la que s'entra como usuariu por invitación, la organización de reivindicación llingüística pretende "llograr dar presencia al nuesu idioma nun espaciu usáu mayoritariamente pola parte más moza de la sociedá". D'esta forma los usuarios asturianos podríen usar les ferramientes d'esta rede en llingua asturiana y les sos publicaciones n'asturianu categorizaríense.