Bloque-UNA propón “un pautu asturianu pola Universidá d’Uviéu” pa garantizar el so futuru

Rafael Palacios, candidatu de Bloque por Asturies-UNA, propunxo esti miércoles “un pautu asturianu pola Universidá d’Uviéu” p’asegurar la financiación de la institución y el so futuru. En rueda de prensa, tamién criticó el ‘Plan Boloña’.
 
Acompañáu de Maite Duarte, responsable d’Educación d’Unidá Nacionalista Asturiana (UNA), Palacios propunxo “un pauto asturianu” por una universidá “pública y de calidá” cola intención de “garantizar el futuru económicu y la vertebración y cohesión social d’Asturies”. “Atopámonos ante una falta de financiación qu’hai qu’iguar pa contratar profesores y pa mantener la calificación de escelencia”, añadió pa depués criticar que “el Gobiernu Asturianu tien perres pa cuestiones como la Fórmula-1 o’l fútbol, pero non pa la educación, que debería ser una prioridá”.
 
Na so intervención, Palacios analizó la situación de la Universidá d’Uviéu que, na so opinión, camina “hacia’l modelu estauxunidense, nel que los estudiantes hipotéquense pa pagar los sos estudios”. “Plantegóse un aumentu de les beques, pero lo qu’hai en realidá ye una mengua importante de los fondos destinaos pa beques, que tán sustituyéndose por préstamos”, continuó. Al so xuiciu, “lo qu’acabará pasando ye que los y les estudiantes acabarán empufaos colos bancos muncho antes d’entrar nel mercáu llaboral”.  
 
Les crítiques al respeutu del ‘Plan Boloña’ nun llegaron namái polos costes altos de les carreres. “Prometiéronse grupos pequeños d’ente ocho y 40 estudiantes per aula, y nestos momentos hai más de 100”, señaló, pa depués añadir que “tamién se plantegó una educación personalizada, pero nesti momentu lo que ta claro ye qu’hai una eliminación de tutoríes y que ta avanzándose hacia la desapaición del derechu a les tutoríes personalizaes”. D’igual forma, llamentó tamién el “endurecimientu brutal del réxime de permanencia”, estableciendo la permanencia obligatoria y “espulsando a toos aquellos que nun pueden permitirse una dedicación esclusiva”.
 
Pa finar, Palacios señaló que “prometiéronse itinerarios d’aprendizaxe flexibles, pero nestos momentos lo qu’hai ye una desapaición de les optatives na Universidad. Namái hai flexibilidad si la pagues”. Na so opinión, “vamos a un xantaxe educativu, con titulaciones inútiles” que tienen unes opciones llaborales duldoses.