Bloque-UNA-LV-GV critica la posición llingüística de Foro y IX

Rafael Palacios y Yolanda Huego criticaron la posición llingüística de los cuatro partíos parllamentarios: Foro, IX, PSOE y PP. “El votu a la nuesa coalición ye’l votu útil pa defender la oficialidá”, señalaron los candidatos de Bloque-UNA-LV-GV.
 
Los cabeces de llista de la coalición nacionalista y verde fixeron estes declaraciones tres aconceyar con representantes de l’Asociación de Trabayadores de la Normalización Llingüística, a los que mostraron el so sofitu antes los recortes que tán viviendo por parte de l’Alministración, lo que dexa a los responsables de los servicios de normalización nuna situación difícil pa poder desenvolver el so llabor. Palacios comprometióse a apoyar la rede de servicios llocales de normalización, “pero non como entes aisllaos o isles apinaes de bones intenciones y pocu presupuestu, sinón como elementos clave d'un ambiciosu Plan de Normalización qu'asegure la normalización real, la tresmisiónxeneracional, la presencia social a tolos niveles y ensin nengún complexu”.
 
“El votu a la nuesa coalición ye'l votu útil pa defender la oficialidá y la normalización, yá que PSOE y PP son los abanderaos del apartheid llingüísticu, y el votu a IX y a Foru nun va traer nenguna meyora, porque'l so apueste pola llingua nun ye sincera nin suficiente”, afirmó Palacios, que pidió espresamente a los defensores y falantes d'asturianu que quieren ver respetaos los sos derechos que voten a Bloque por Asturies-Unidá Nacionalista Asturiana-Los Verdes-Grupo Verde (Bloque-UNA-LV-GV) pa que'l 25-M puedan rexistrase un númberu de votos importantes “inequívocamente a favor de la llingua”. “N’Asturies tase sistemáticamente conculcando la Declaración Universal de Derechos Humanos, la Declaración Universal de Derechos Llingüísticos, la Carta Europea de les Llingües Minoritaries y la mesma Constitución Española, polo que fai falta que les persones conscientes d'esta situación camuden el so votu y ruempan colos partíos y los discursos de siempre, porque ta más que demostrao que pa los partíos qu'anguaño tán nel parllamentu, defendan lo que defendan nos sos programes, ésti ye un tema menor”, añadió Palacios, que se refirió darréu a la política de Foro: “Nin defenden la oficialidá, una midida imprescindible pa la normalización, nin aumenten la presencia del asturianu onde gobiernen, sinón que tán faciendo sumir lo poco qu'había; nel so mandatu desapaecen medios de comunicación n'asturianu, amenorguen drásticamente les ayudes –cuando sí hai dineru pa la ópera– y prometen agora que van crear la especialidá docente d'asturianu cuando perdieron la oportunidá de facelo l'añu pasáu”, aseguró.
 
“Nun ye creíble que Foro se presente ante los asturianistes como'l partíu que va defender la nuesa llingua cuando tien una visión paternalista y folclórica de la mesma”, continuó Palacios, dalgo que “nun ye abondo cuando falamos d'un idioma que tien de ser normal, que la so tresmisión xeneracional tien de garantizase y que tien de tar al nivel del restu de les llingües oficiales, daqué que ta a años lluz de los planteamientos de Foru, y por tanto, a años lluz de los mínimos que tienen d'esixir les persones defenden la normalización del idioma”. No que respeuta a Izquierda Xunida, Huergo afirmó que “el so programa recueye la oficialidá, pero pa ellos l'asturianu ye un elementu que figura nos puestos postreros na so llista de prioridaes y reivindicaciones, polo que nunca van ponelo nel centru del debate políticu, que ye lo qu'una llingua en peligru precisa”. La númberu dos de Bloque-UNA-LV-GV pola circunscripción central considera qu’IX “va años que considera'l problema llingüísticu amortizáu y sólo asina pueden entendese les demagóxiques declaraciones de Jesús Iglesias nes que quitaba importancia a la recuperación de la toponimia, lo que da una midida de lo poco sinceru del so apueste y de lo cosméticu que resulta cuando falamos d'una cuestión de derechos fundamentales”.