Bloque-UNA fai una defensa de la educación pública y critica los recortes del Gobiernu

La decición del Gobiernu d’eliminar 288 places docentes pal cursu qu’entra foi criticada pol Bloque por Asturies-UNA, qu’aprovechó la ocasión pa facer una defensa de la educación pública. La coalición esixe a la Conseyería d'Educación una rectificación.
 
Pal Bloque por Asturies-Unidá Nacionalista Asturiana (UNA) esta “ocurrencia” del Gobiernu pal cursu qu’entra  “ataca ún de los pegollos del estáu de bienestar”. “La enseñanza pública ye primordial p’asegurar la igualdá d’oportunidaes de los escolinos independientemente del estatus social y económicu de les sos families, pero los recortes qu’anunció la Conseyería d’Educación van suponer que cada maestru tenga más escolinos en clase y tean peor atendíos, van recortase algunos programes educativos, va menguar l’atención a la diversidá y los escolinos que más lo van notar van ser los que tienen necesidaes educatives especiales, que son los que más atención necesiten”, añaden dende la formación nacionalista.
 
La coalición asturianista asegura que los responsables políticos asturianos “vuelven a utilizar la disculpa de la crisis pa tomar midíes qu’ataquen a la calidá de la enseñanza pública y les condiciones de trabayu de los maestros y les maestres” y denuncia que’l Gobiernu “paez que ta empeñáu n’acabar d’una vez por toes cola enseñanza pública y n’amarrase tolos díes colos sindicatos mientres desenvuelve’l mesmu programa que la derecha nos sitios onde gobierna”. Pa finar, Bloque-UNA esixe “una rectificación dende agora mesmo”.
 
Los sindicatos docente tamién mostraron la so disconfirmidá cola eliminación de 89 places en Primaria; 95, en Secundaria; 55, en Formación Profesional; y 49, n’escueles d’arte. Asina, el Sindicatu Unitariu y Autónomu de Trabayadores de la Ensañanza d’Asturies (SUATEA) refugó dafechu “la actitú d’un Gobierno que fai de menos d’esta manera la enseñanza pública, pese a presumir d’ésitu escolar, pela vía d’eliminar de manera constante recursos que son fundamentales pa la calidá educativa y que, en munchos casos, afeuten a los seutores más sensibles del sistema, como ye l’alumnáu con dificultaes mayores”.