Bloque-UNA de Siero denuncia l’incumplimientu de la toponimia oficial nel enllaz de Mudarre

El Bloque por Asturies-UNA de Siero treslladó al Conceyu, a la Conseyería de Cultura y al Ministeriu de Fomentu la so disconfirmidá pol incumplimientu de la toponimia oficial nel enllaz de Mudarre. Namái s’utilicen los nomes castellanizaos.
 
Según indiquen dende la coalición nacionalista, dende hai unos díes pue vese que los indicadores d’esti enllaz que xune l’Autovía Minera cola Autovía Uviéu-Villaviciosa faen usu de los topónimos ‘Pola de Siero’, ‘Gijón’, ‘Langreo’ y ‘Gargantada’ cuando los oficiales son La Pola Siero, Gijón/Xixón, Langreo/Llangréu y Gargantá, esto ye, los tradicionales. “A estes altures ye inalmisible pal Conceyu Siero que se llanten unos lletreros nel encruz de Mudarre faciendo burlla” del llabor de recuperación de la toponimia y “poniendo nomes que yá nun son oficiales va años”.
 
Polo tanto, esixen en trés cartes personalizaes unviaes al Conceyu de Siero, a Cultura y al ministeriu’l respetu a la toponimia del país y el cumplimientu de los decretos aprobaos nel so día pol Conseyu de Gobiernu d’Asturies.