Bloque-UNA d’Uviéu edita un periódicu col nome ‘Compromisu’ onde espón les sos propuestes

‘Compromisu’ ye’l nome d’un proyeutu novedosu entamáu por Bloque por Asturies-UNA d’Uviéu. Trátase d’un periódicu nel que firmes de renome de la vida social uviedina reflexonen sobre les propuestes de la coalición nacionalista.
 
Carlos Lastra, Xosé Ambás, Nacho González, Penélope Miranda o Candela Villaro son dalgunes de les 27 persones representatives del ecoloxismu, la izquierda, l’asturianismu y los movimientos sociales d’Uviéu que dan la so opinión en ‘Compromisu’ sobre les propuestes de Bloque por Asturies-Unidá Nacionalista Asturiana (UNA) pa la ciudá. Fernando Ornosa, candidatu de la coalición a l’alcaldía, xunto con otros miembros de la llista municipal, van repartir exemplares de ‘Compromisu’ mañana, sábadu, nel mercáu d’El Fontán a partir de les 12.30 hores.
 
L’equipu de comunicación de Bloque-UNA afixó los conteníos d’esti periódicu a la llei eleutoral nueva, que permite a les formaciones que participen nes eleiciones la realización y distribución de folletos, cartes o panfletos, o de soportes dixitales, pa dar a conocer a los candidatos y les sos propuestes.