Bloque por Asturies y UNA reediten la coalición eleutoral pa la cita coles urnes del 25 de marzu

Los órganos representativos del Bloque por Asturies y UNA alcordaron participar en coalición nes eleiciones nacionales anticipaes del 25-M. Dambes formaciones apuesten por esta opción pa continuar col procesu xunitariu tres esa fecha.
 
Nun comunicáu al que se ciñen les dos formaciones, Bloque y UNA confirmen qu’hubo contautos nestos dos díes últimos con representantes d’otres formaciones sobre la posibilidá d’ampliar la coalición de cara a la cita de marzu, “una opción plantegada nos órganos de dambes organizaciones y reclamada nos últimos díes dende dellos sectores”. Sicasí, señalen qu’éstos “nun fructificaron ante la imposibilidá d'una negociación por, ente otres razones, la premura de tiempu cola que se realizó la convocatoria eleutoral”. La intención de Bloque por Asturies y Unidá Nacionalista Asturiana (UNA) nesti sentíu ye la de “siguir trabayando por una alternativa lo más amplia posible, ensin les prieses electorales, depués del 25 de marzu”.
 
Sobre la cita eleutoral, Bloque-UNA preséntase como “una alternativa en clave asturianista, d'izquierdes y ecoloxista que defenda ensin medies tintes los intereses de la mayoría social y del país, que cunte colos movimientos sociales, que tenga un proyeutu p’Asturies non sucursalista y que plantege como meta la defensa de los intereses de la mayoría”. La coalición afirma qu’estes eleiciones anticipaes “pon n'evidencia'l nulu respetu que les fuerces parllamentaries asturianes tienen pola ciudadanía que representen, colo que quedó afitada la fuexa esistente ente ésta y los partíos políticos parllamentarios”, como demuestra’l fechu de que “en medio d'esta crisis terriible que sufrimos, condérgasenos, por parte de toos ellos, a la ingobernabilidá y al costu económicu que supon unes eleiciones nueves”.
 
Por esti motivu, los nacionalistes diríxense a “la sociedá asturiana, los trabayadores, les persones esmolecíes pol futuru d'Asturies, la so identidá, patrimoniu y la so cultura, la ciudadanía que s'esmolez pol mediu ambiente”, pa qu’espresen al traviés del votu’l so refugu “a les polítiques d'axuste antisociales que los distintos gobiernos asturianos, enantes PSOE-IU, agora FAC –que'l so compromisu con Asturies resultó ser inesistente–; y de los gobiernos españoles del PSOE y del PP”, amás de pa castigar “a quiénes anteponen los intereses partidistes a los d'Asturies”.
 
Otra manera, los órganos de los dos partíos van aconceyase próximamente pa definir les llistes de les trés circunscripciones eleutorales.