Bloque por Asturies-UNA-LV-GV presenta dos denuncies ante la Xunta Eleutoral contra la RTPA

La coalición Bloque por Asturies-UNA-LV-GV pidió l’amparu de la Xunta Eleutoral ante la “discriminación” que sufre dende la RTPA. L’ente públicu nun entrevista a la formación pese a cumplir los requisitos qu’impón la direición d’informativos.
 
Según señalen nun comunicáu, presentáronse dos denuncies ante la Xunta Eleutoral contra la RTPA por "incumplir los sos criterios propios" y por "modificar de manera arbitraria" los mesmos pa escluyir a la coalición de les entrevistes eleutorales que tán faciendo a les formaciones principales. Na primer reclamación, Bloque por Asturies-Unidá Nacionalista Asturiana-Los Verdes-Grupo Verde (Bloque-UNA-LV-GV) espón que l’ente públicu anunció de forma oficial que convidara a les entrevistes colos candidatos a los partíos mayoritarios y a UPyD porque ésta yera l’única organización que superara’l 1 por cientu del total de votos nes eleiciones de mayu. Un datu, de primeres, incorreutu, yá que Bloque-UNA sumó un 1,03 por cientu de los votos, al igual qu’Ideas, qu’algamó un 1,06.
 
La segunda denuncia, que según la coalición tien una"gravedá especial", refierse al cambiu de criterio de la RTPA, deriváu de l’alvertencia de que debíen d’entrevista al candidatu de Bloque-UNA-LV-GV, Rafael Palacios, y que, de nun ser asina interpondríen una reclamación ante la Xunta Eleutoral. La organización nacionalista y verde sostién que "ante esti pidimientu y l’alvertencia de pidimientu d’amparu a la Xunta Eleutoral, la RTPA cambió na so web los criterios anunciaos de forma previa, estableciendo que namái entrevistaría a aquellos partíos que superaran el 1 por cientu de los votos sobre’l total del censu, "col oxetivu nidiu y únicu de mantener la nuesa esclusión". Sicasí, l’ente torna a errar, yá que si se sumen los votos de Bloque-UNA y de LV-GV (0,60 por cientu del total de votos rexistraos), sí se supera esa cantidá.
 
Por ello, solicita a la Xunta Eleutoral qu’adopte rápido les midíes oportunes y insta a la RTPA a emitir la entrevista con Palacios, candidatu de la coalición.