Bloque por Asturies-UNA-LV-GV presenta ‘Piensa otra Asturies’, el so periódicu de campaña eleutoral

Yolanda Huergo encargóse de presentar esti xueves ‘Piensa otra Asturies’, periódicu de campaña que Bloque-UNA-LV-GV va repartir nestes xornaes próximes. Nél, la coalición asturianista y verde defende la rexeneración de la política.
 
Según esplicó la númberu dos de la llista de Bloque por Asturies-Unidá Nacionalista Asturiana-Los Verdes-Grupo Verde (Bloque-UNA-LV-GV), Yolanda Huergo, el periódicu trata d’averar a los y les votantes, "d'una manera gráfica y directa, l'Asturies que tenemos y el país que nós pensamos que tendríamos que tener, pol que tamos lluchando día ente día, y pal que pidimos el votu". Pa ello, la organización utiliza titulares de prensa “que falen por si mesmos”, dexando de llau les frases feches y los tópicos qu’utilicen el restu de candidatos.
 
‘Piensa otra Asturies’ divídese en dos partes. Na primera, preséntense "titulares de prensa sobre l’Asturies que tenemos nestos momentos, protagonizada pol retrocesu económicu, mentires y falta de principios na clase política, retayos antisociales, complicidá de les fuerces polítiques parllamentaries nel caltenimientu del statu quo, personalismos y griesca, sumisión a los intereses de los gobiernos centrales, desinversiones, paru, emigración, corrupción, impunidá xudicial, negación de la cultura propia, estroces medioambientales y maltratu animal". Mentes, la segunda, recueye iniciatives de la coalición o los sos integrantes recoyíos pola prensa. “Proponemos un cambéu radical, na que la política sía sinónimu de compromisu, coherencia, alternatives a la crisis, defensa de los servicios públicos, capacidá d’Asturies de decidir sobre'l so presente y futuru, respuestes contundentes a la corrupción, planteamientos ecolóxicos, y defensa de la nuesa cultura y derechos, como la oficialidá", enumeró Huego.
 
“Si les fuerces parllamentaries, con distintos graos de responsabilidá, pero quiera que non, corresponsables de la situación actual, impónennos esta realidá de retayos, corrupción, sucursalismu; y si los partíos faen los contrariu cuando gobiernen que lo que prometieron en campaña, la nuesa coalición propón que construyamos otra Asturies, onde los axustes s'apliquen a quien provocaron la crisis, onde los intereses d’Asturies tean percima de los personalismos, la corrupción se persiga con toles consecuencies y s'abandone la visión de qu'Asturies ye menor d'edá políticamente falando”, aseguró la vocera de la coalición. Por esti motivu, pide a los eleutores que nun apoyaron nin a Bloque-UNA nin a LV-GV en mayu, que camuden el so votu porque "ye posible defender de forma efectiva los nuesos intereses económicos, sociales, culturales y medioambientales”.
 
Actu central de campaña
 
Esti sábadu va celebrase nel Centru Municipal Integráu d'El Llano, en Xixón, l'actu central de campaña de la coalición nacionalista y verde. Ésti va principiar a les 12.30 hores y nél van intervenir Rafael Palacios y Huego. Tamién habrá dalguna actuación musical.