Bloque por Asturies-UNA-LV-GV preséntase como una “alternativa real” a les fuercies mayoritaries

El salón d’actos de la Biblioteca d’Asturies acoyó esti sábadu la presentación de la candidatura de Bloque-UNA-LV-GV. El so cabezaleru, Rafael Palacios, destacó'l caráuter de “alternativa real” de la coalición asturianista y verde.
 
Palacios destacó na so intervención l’añu que perdió Asturies y criticó a les fuercies mayoritaries por nun ser capaces “nin siquiera de facer un presupuestu”. “Namái se ponen d’alcuerdu pa lo que-yos beneficia. Nun hai más que ver que nun son capaces nin de reunise pa situaciones como l’amenaza de pieslle d’Arcelor n’Asturies”, continuó’l númberu ún de la llista de Bloque por Asturies-Unidá Nacionalista Asturiana-Los Verdes-Grupo Verde (Bloque-UNA-LV-GV) pela circunscripción central.
 
Ante esta situación que vive’l país, el candidatu quinxo presentar la coalición nacionalista y verde como una “alternativa real” frente a les fuercies mayoritaries. “Ente les trés formaciones que componen esta coalición, sumamos más de 10.000 votos en mayu del añu pasáu. Queremos ser aquellos que condicionemos les polítiques nesti país, pa lo que necesitamos tener representación”, esplicó Palacios, que reafirmó’l compromiso de la candidatura “cola educación y la sanidá pública, los servicios sociales y la defensa decidida d’un futuru dignu pa la cultura y la llingua asturiana.” Tamién quinxo destacar “el caráuter ecoloxista y de defensa de los derechos de los animales reforciáu cola presencia de Los Verdes-Grupo Verde na coalición”. Pa finar, pidió l’apoyu “a toos aquellos que nun se resignen ante la situación actual y quieren que se camuden les polítiques que sufrimos agora”.
 
Nel actu, que presentó Roberto Holgado, conceyal de Bloque-UNA en Carreño, tamién intervinó Yolanda Huergo, númberu dos de la candidatura pola circunscripción central, que señaló que “tener que venos equí güei ye la preba de que la política asturiana perdió'l rumbu va bien de tiempu”. Huergo calificó de “infantil, patéticu y vergoñoso” lo visto na Xunta Xeneral nos meses últimos y nun auguró cambios nes fuercies mayoritaries nun futuru. La vocera de la coalición apuntó que’l compromisu col país de la coalición nun nacía del oportunismu o’l cinismu, “sinón de munchos años de trabayu na defensa de los intereses d’Asturies y la so xente”, pa depués afirmar qu’esta convocatoria eleutoral ye un pasu más “pa siguir avanzando na construcción de l’alternativa”. Mentes, Holgado definió la candidatura Bloque-UNA-LV-GV como “una apuesta decidida pola xunidá”, y el pautu de la izquierda asturianista y verde como “la ferramienta necesaria nestos momentos”.