Blimea celebra la fiesta los pimientos rellenos

Nueve restoranes del pueblu sirven el menú dende'l miércoles y hasta'l domingu.

El 8 d'avientu ye, dende l'añu 1975, la fecha escoyida pa celebra la Fiesta de los Pimientos Rellenos. Esta folixa gastronómica foi garrando fuercia nestos 41 años hasta convertise nuna cita esperada por munchos asturianos que, amás de los pimientos rellenos de bonitu o de carne, disfruten de les munches actividaes organizaes pa estos díes.

La parte central de la fiesta, la gastronómica, comienza mañana, cuando diez restoranes de Blimea empiecen a servir el tradicional menú compuestu polos pimientos rellenos asaos o al fornu, de primeru; callos, de segundu; y frixuelos, de postre. Los establecimientos que los ofrecen, tanto pa la xinta como pa la cena, a un preciu d'al rodiu los 20 euros son la Casa del Pueblo, Crespo's, El Curro, La Peña, Casa Pepe Luis, El Rinconín de Xuan, San Mamés, El Trus y El Miramar. Tamién ye posible pidir una ración individual de pimientos.

Programa festivu

Les actividaes fesives van empezar tamién mañana cola llectura del pregón por parte de María José González Campos, direutora del Centru Integráu de Formación Profesional Hostelería y Turismu del Principáu d'Asturies. Va ser a les 19 hores nel Centru Social de Blimea, a lo que va siguir la entrega del Pimientu d'Oru al escritor llocal Elviro Martínez Fernández, que fora profesor d'Historia mientres munchos años del colexu xixonés Inmaculada, y una actuación de la Coral San Martín de Sotrondio.

La primer verbena va celebrase na carpa instalada nel Campu esa mesma nueche, a les 23.30 hores, y va contar cola actuación de la orquesta K-Libre y la presencia de DJ Chospito Show, mentes que la segunda va tener llugar el sábadu, cola orquesta Tekila y el mesmu pinchadiscos. El teatru, la música metal y los acontecimientos deportivos protagonicen dalgunos de los munchos eventos del programa d'estes fiestes, que pue consultar nel documentu axuntu a esta noticia.