Blima presenta “Express”, un discu renováu

El grupu folk Blima presentó n’Uviéu “Express”, segunda referencia discográfica col que la banda renueva l’instrumental y entra Mapi Quintana a la voz.

La voz de la música y cantante de 'folk-jazz' Mapi Quintana, que sustitúi a la vocalista del anterior trabayu, Silvia Quesada. Ye ún de los munchos cambios qu'incorpora esti conxuntu nel so nuevu discu, 'Express', qu'anueva casi dafechu'l so instrumental, quitando l'acordión diatónicu de Marcos García.
  
El nuevu discu pesentóse en rueda prensa n'Uviéu, con presencia de Lisardo Prieto, responsable de Discos Tierra, la entidá que publica l'álbum.
  
El titular de la discográfica definió 'Express' como una "una nueva llinia de trabayu" pa esti grupu. Asina, dende'l so puntu de vista, el discu de Blima demuestra que "el folk ye algo non estancu, que ta evolucionando".
  
La voz de Mapi Quintana ye la principal novedá. Los integrantes del grupu almitieron les dificultaes d'adaptación de los instrumentos al nuevu formatu vocalista d'esta intérprete, que cultiva'l xéneru de la 'tonada-jazz'. "Ye otru tipu de voz que mos abre'l campu pa trabayar coses qu'antes nun facíamos", señala.
  
Marcos García encargóse de detallar los otros cambios na grabación con respecto al primer trabayu, 'Entamu', publicáu hai trés años. En 'Express' el violín de Gonzalo Pumares sostituyó a la flauta travesera, la guitarra de Fernando Oyágüez al bouzouki, y incorporen el contrabaxu de J.C. Vega "Cabín". Amás, inclúi delles collaboraciones con instrumentos de metal: trombón (Toño Gómez), trompeta y fliscornu (dambos Miguel Herrero).
  
L'acordionista destacó tamién les collaboraciones de Juanjo Díaz (udu y shaker), Senén Fernández (batería), Xurde Fernández (flauta), Xacintu Gafarrón (guitarra eléctrica y programación, y el músicu escocés Martin O'Neill (bodhrán).
  
Lisardo Prieto destacó tamién los arreglos de tipu 'rock' y 'pop' que dan nuevos aires a la música de Blima, asina como la masterización n'Alemaña, "una esperiencia que recomendamos", señaló García. El discu compónse de diez cantares, amás d'un 'bonus' ('Siete pallabres'). Va presentase esti sábadu, 29 de xineru, nel Teatru Vital Aza de La Pola L.lena, a partir de les 20.30 hores.
  
La publicación cuenta col apoyu de la Dirección Xeneral de Política Llingüística de la Conseyería de Cultura.

Continuidá del formatu discu
Los músicos y asistentes al actu falaron sobre la continuidá o non del formatu del discu CD, ante la dómina de descargues per Internet na que se somorguió'l mercáu de la música.
  
Asina mientres Fernando Oyágüez considera qu'esti va ser l'últimu discu de Blima, tanto Marcos García como Lisardo Prieto, amás del críticu musical Aurelio Argel, consideraron que'l CD va siguir teniendo una "vital importancia" como carta de presentación de los grupos, y va siguir vendiéndose nos conciertos al públicu más fiel de cada estilu.