Blanco viaxará a Bruxeles cola intención de defender la siderurxa asturiana

Quier midíes que torguen la entrada na Xunión Europea de productos chinos y rusos.

Francisco Blanco va viaxar a Bruxeles la próxima selmana pa defender énte les autoridaes europees la industria asturiana del aceru frente a la competencia deslleal de países como China y Rusia, que venden productos a un preciu inferior al del so costu de producción. El conseyeru d'Emplegu, Industria y Turismu va axuntase nel Parllamentu européu col eurodiputáu y miembru de la Comisión d'Industria, Investigación y Enerxía, Eduard Martín, y col eurodiputáu asturianu Jonás Fernández, miembru de la Comisión d'Asuntos Económicos y Monetarios.

El titular d'Industria va esponer la situación del sector del aceru y de la industria electrointensiva n'Asturies y va insistir na necesidá de que Bruxeles entaíne l'aplicación de midíes correutores que torguen la entrada de productos baratos nel mercáu européu. Amás, el conseyeru va celebrar un alcuentru con representantes de la Organización Europea de la Industria del Aceru (Eurofer), una entidá formada nel 1976 que ta integrada por empreses del sector y federaciones d'asociaciones de distintos países de la XE.

Na Representación Permanente d'España ante la XE (Reper), Francisco Blanco va esponer a Miguel Ceballos, xefe de gabinete de la comisaria de Comerciu, la necesidá de qu'Europa s'asitie en contra de la reconocencia de China como economía de mercáu, pola so competencia deslleal y porque nun ufierta garantíes en relación colos derechos llaborales y la proteición medioambiental. Nesti sen, el conseyeru recordó que va unes selmanes, la Comisión Europea aprobó la imposición de midíes antidumping, con calter provisional, a les importaciones de chapes llaminaes en fríu procedente de China y Rusia, mesmo que l'apertura d'un espediente contra les importaciones de bobines y chapes llaminaes chines.

Visita a la planta de Dacero

El titular d'Industria detalló'l programa del so viaxe a Bruxeles nuna visita a la planta xixonesa de la empresa Dacero, integrada nel Grupu Alonso y dedicada a la fabricación y comercialización de productos siderúrxicos a midida pa sectores como l'eólicu, el petroquímicu, el naval, el ferroviariu y la construcción. Nel percorríu tuvo acompañáu pol presidente honoríficu, Daniel Alonso; el conseyeru delegáu del Grupu Daniel Alonso, Orlando Alonso; la xerente de Dacero, Eva Álvarez, y el director xeneral d'Industria, Luis Ángel Colunga.

Dacero ye una de les principales consumidores de chapa gruesa, ún de los productos amenazaos pola entrada nel mercáu européu d'aceru chinu a precios baratos. La empresa procesa 200.000 tonelaes de chapa y ArcelorMittal ye unu de los sos provisores d'aceru. Ello ye que el so centru de producción de Xixón ta asitiáu n'el mesmu perímetru d'esta factoría.