Blanco va facer funciones de voceru del Gobiernu y Camacho pasa a ser ministru del Interior

Zapatero dio a conocer les cares nueves del Executivu tres la dimisión d’Alfredo Pérez Rubalcaba pa centrase na candidatura del PSOE a les eleiciones. José Blanco va facer funciones de voceru y Antonio Camacho pasa a ser ministru del Interior.
 
El presidente estatal esplicó güei que dio’l cargu de voceru al ministru de Fomentu porque “conoz bien l'aición que'l Gobiernu ta llevando alantre” y que tien con él “una confianza bien direuta, llabrada mentes muncho tiempo”, lo que “facilita ensin dulda'l llabor de ser voceru”. No que respeuta a Camacho, secretariu d'Estáu de Seguridá dende’l 2004,destacó la so “trayeutoria dilatada” nun ministeriu que collechó “ésitos grandes na llucha antiterrorista”. En pallabres de José Luis Rodríguez Zapatero, el ministru d’Interior nuevu “contribuyó a esos ésitos, conoz a fondu la seguridá, y en concreto la llucha contra'l terrorismu”, de manera que tien un “perfil bien afayadizu”.
 
Amás d’estos nomamientos, Zapatero anunció que les vicepresidencies del so Gobiernu van quedar reducíes a dos, “una p'Asuntos Económicos”, que va caltener Elena Salgado, y otra pa Política Territorial, la del güei vicepresidente terceru Manuel Chaves. Anque nun fixo mención al orde de les vicepresidencies, sí esplicó que na so ausencia va ser Elena Salgado, güei vicepresidenta segunda, la que presida'l Conseyu de Ministros.