Blanco sigue como secretariu xeneral de Sanidá con Illa

Accediera al cargu de la manu de María Luisa Carcedo tres la dimisión de Carmen Montón.

El Conseyu de Ministros d'ayeri anunció la continuidá nel cargu de secretariu xeneral de Sanidá del xixonés Faustino Blanco, conseyeru de Sanidá del Gobiernu d'Asturies del 2012 al 2015 con Javier Fernández. El ministru de Sanidá nuevu, el catalán Salvador Illa, caltién la confianza nel médicu especialista MIR en Medicina Familiar y Comunitaria que venía trabayando nel Centru de Salú d’El Coto de la so ciudá de nacencia.

Blanco incorporárase al Ministeriu de Sanidá, Consumu y Bienestar Social, anguaño Sanidá, en setiembre del 2018 tres el nomamientu de Carcedo al frente del mesmu. La de Santa Bárbola sustituyera a Montón depués de qu'ésta se viera obligada a dimitir por una acusación d'irregularidá na obtención d'un master na Universidad Rey Juan Carlos, causa que meses depués foi archivada.

Na semeya, Carcedo y Blanco mientres una visita nel HUCA.