Blanco pide a Alcoa que garantice'l futuru de la planta d'Avilés

La empresa quier vender la so factoría asturiana y les dos gallegues.

El conseyeru d'Emplegu, Industria y Turismu, Francisco Blanco, pidió a los responsables de la empresa Alcoa que, si finalmente deciden vender la so factoría d'Avilés, escueyan un inversor con un proyeutu industrial que garantice'l futuru de la planta y desenvuelva tol so potencial, más allá de la ellaboración d'aluminiu primariu. “Tresmitimos a la empresa la necesidá d'apostar por un inversor interesáu que tenga esi perfil”, apuntó.

Tamién indicó que ta en contautu permanente colos responsables de la empresa y que nos últimos díes caltuvo delles conversaciones col presidente de la multinacional n'Estáu, Rubén Bartolomé. “Tamos al tanto del procesu que tán siguiendo pa buscar posibles inversores nes plantes d'Asturies y Galicia”, dixo.

Nesi sen, Alcoa yá tien un comprador interesáu, según anunció al meudía 'La Voz de Galicia'. La empresa, de la que nun se conoz el nome entovía, va visitar les plantes d'Avilés, San Cibrao y A Coruña mañana.