Blanco asegura qu’enantes de que fine la llexislatura va sacar a puya les obres del AVE hasta La Pola Ḷḷena

El ministru de Fomentu, José Blanco, aseguró nel Senáu que va sacar a puya los sistemes de comunicaciones, seguridá y electrificación del AVE ente Lleón y Ḷḷena. El socialista fixo estes declaraciones en respuesta a Isidro Martínez Oblanca.
 
Blanco trató’l tema del AVE ente Lleón y La Pola Ḷḷena na sesión de control al Gobiernu en respuesta a la intervención del senador de Foro Asturias Ciudadano (FAC), Isidro Martínez Oblanca. L’unicu representante d’un partíu asturianu na cámara alta consideró que de nenguna manera los asturianos van disponer de l'alta velocidá ferroviaria que conecte’l país cola meseta dao que, al so xuiciu, la llinia Lleón-Asturies “ye una collecha permanente d'incumplimientos y engaños” per parte del Gobiernu, “productu del Plan Estratéxicu d'Infraestructures y Tresportes 2005-2020”.
 
En llamentando'l cambiu de feches estimaes pol Executivu pa la entrada en serviciu de dicha infraestructura, el senador consideró que'l futuru económicu d'Asturies “queda condicionáu poles decisiones del Gobiernu en materia ferroviaria”. “Nin l'ausencia de puyes, nin el cuentín de les altes prestaciones, nin los retrasos d'execución, nin la falta de programación, nin los retayos de más de 1.148 millones d'euros, respuenden al interés xeneral d'Asturies y d'España”, añadió.
 
Na so respuesta, el ministru de Fomentu destacó que'l Gobiernu socialista invirtió dende'l 2004 un total de “2.600 millones d'euros n'alta velocidá Lleón (variante de Payares)-Asturies frente a los siete millones d'euros” qu'invirtió'l Gobiernu del PP. “Va tardar décades en qu'haya una inversión fuerte n'Asturies como hubo nestos siete años de Gobiernu socialista”, sorrayó Blanco p'añadir que se pasó de “1.900 millones d'euros col Gobiernu del PP n'ocho años a 4.170 millones d'euros col Gobiernu socialista en siete años”, polo qu’apuntó que la inversión por habitante “agora ye de cuatro millones d'euros frente a los 1,7 millones d'antes”.
 
“Esto ye la realidá y lo otro son les sos mentires y les de quien-y escribe'l panfletu que lleó”, insistió Blanco en referencia a Francisco Álvarez-Cascos. Por último, el ministru señaló que, una vez edificada la variante de Payares, Asturies va ser “sobre 2014-2015, una de les primeres comunidaes del noroeste onde los ciudadanos van poder desplazase nesti serviciu”.