"Bisarmes" terror n'asturianu con Txema Blasco

Txema Blasco, actor d'ente otres películes "Obaba", "Carne de Gallina", "Vacas, "Tierra" y actualmente nel repartu de la serie de Tv "Cuéntame", volvió a Asturies esta selmana dempués de ser l'añu pasáu ún de los protagonistes del espectáculu músico- Teatral "José", representáu en Candás y dirixíu por Pablo A. Quiroga Prendes. El motivu del retornu del actor yera la so partcipación nel rodaxe del curtiu "Bisarmes", cinta que l'equipu de producción define como de "ficción y fondu terror sobrenatural". Francisco Martínez Peláez ye'l director d'esti curtiu n'asturianu producíu y por Pablo A. Quiroga Prendes y l'Asociación Cultural "Santu Milagru" de Candás gracies al patrociniu del Conceyu de Carreño y la collaboración de la empresa Ventura Gráfica.

El director de curtios de Xixón Jaime Fernández Miranda collaboró tamién nel rodaxe d'esti "Bisarmes" que va pasar agora per un llargu procesu de postproducción, nel que van enxertase efectos visuales xeneraos por ordenador, pa lo que se va contar cola collaboración del espertu Pablo "stewie" López. El proyectu de los realizadores ye poder rematar pal mes de febreru tol procesu y asina poder entamar a presentar la cinta a tolos festivales cinematográficos.