Bimenes y la XDLA entamen una carrera pola oficialidá

|
Cartelu I Carrera pola Oficialidá

Dos percorríos, ún esixente de 16 quilómetros y otru más curtiu pa tolos públicos, ye la propuesta del Conceyu de Bimenes y la Xunta pola Defensa de la Llingua Asturiana (XDLA) pa la I Carrera pola Oficialidá. Va celebrase’l 14 d’ochobre y yá tien abiertu’l plazu d’inscripción.

La carrera principal, de perfil montañeru pese a ser per asfaltu, tien un llargor de 16 quilómetros y va percorrer les trés parroquies del conceyu: Santu Medero, Santuyano y Suares. Esta ruta tien desnivel positivu de 340 metros y calter competitivu, con un preciu d’inscripción de 3 euros.

Pa la xente menos preparao, la organización entama una segunda prueba de 3 quilómetros, con salida (16 hores) y final tamién en Santuyano. La inscripción, nesti casu, tien un costu de 6 euros y inclúi, al igual que la carrera principal, un dorsal con chip, seguru, camiseta conmemorativa, avituallamientos y bolsa de corredor o corredora.

Los trés primeros clasificados, homes y muyeres, del percorríu de 16 quilómetros, van llevar troféu, mentes que pa la carrera de 3 quilómetros va haber pal meyor home y muyer de la prueba. Les persones interesaes en participar pueden facelo on line na web de Crono Check hasta’l 10 d’ochobre.

“La oficialidá ye un camín difícil y duru; pero nun hai cuestes, nin quilómetros, nin obstáculos que mos paren. La dignidá de la llingua asturiana pasa pola oficialidá. Apúntate y cuerre con nós na Carrera pola Oficialidá”, animen dende la organización.

Contador Estadistiques