Bimenes prepara con delles actividaes la XXV Fiesta de la Oficialidá

Nun va poder ser como los yerbatos tán avezaos, pero Bimenes nun quier dexar de celebrar la declaración d’oficialidá del asturianu nel conceyu del 1997. La XXV Fiesta de la Oficialidá va tener llugar el sábadu con un actu institucional pela mañana y un conciertu pela tarde, con actividaes programes tamién a lo llargo de la selmana.

La situación sanitaria pola pandemia de COVID-19 tampoco nun frena esti añu la Fiesta de la Oficialidá, anque sí impide que se desendolque de la manera habitual. Nun va haber poro xira popular nin l’actividá festiva qu’entama’l Conceyu de Bimenes el sábadu más cercanu al 5 de xunetu, día que, nel 1997 baxo’l mandatu de Joaquín ‘Xuacu’ García Gutiérrez, el Plenu dio’l pasu de declarar oficial l’asturianu, pero nun va faltar l’actu institucional.

Otros conceyos siguieron el camín marcáu por Bimenes hasta que’l Tribunal Superior de Xusticia (TSXA) torgó al añu la voluntá de les yerbates y yerbatos al considerar que l’Ayuntamientu nun tenía competencia pa ello. Ello nun quitó pa que se siguiera celebrando esta fecha tolos años vinientes, convirtiendo la Fiesta de la Oficialidá nuna fecha señalada en Bimenes.

L’alcalde actual, Aitor García Corte, tornó a declarar la oficialidá en Plenu nel 2016 coincidiendo col venti aniversariu de la folixa, decisión aprobada por unanimidá. Un xestu nuevu de sofitu de Bimenes a la llingua asturiana, que cuenta con una vitalidá grande ente los tolos vecinos del conceyu, que salen esti sábadu a participar nuna fiesta que per segundu añu nun va poder contar con actos multitudinarios.

A les 13 hores va celebrase un actu institucional nel Palaciu del Marqués de Casa Estrada, en Martimporra, nel que García Corte va tar acompañáu pol so homólogu en Miranda de l Douro, territoriu portugués hermanáu con Bimenes onde la llingua propia, el mirandés, pertenciente al tueru asturlleonés, ye oficial. Darreú va haber una actuación musical de Los Yerbatos.

De tarde esi mesmu llugar va acoyer un conciertu de Los Gascones y Figos de Tuna, con entamu previstu a les 18 hores. Tolos actos tán abiertos al públicu y va permitise l’accesu hasta completar aforu, siguiendo los protocolos de seguranza frente a la COVID-19.

Selmana Cultural

El Conceyu tamién caltién la Selmana Cultural pola Oficialidá del Asturianu, con delles actividaes programes estos díes previos a la Fiesta de la Oficialidá. El vienres la escritora llocal Blanca Fernández presentó la so novela ‘L’home les caparines’ y mañana va entamase una visita guiada, a les 18.30 hores, a la Casa de les Radios, que va tar abierta de 17 a 20 hores.

El miércoles, a les 18 hores, les neñes y neños de 8 a 12 años van poder conocer na Casa Cultura de Santuyano les téuniques del cómic con un profesional de tanta trayeutoria como Ruma Barbero. Esti taller forma parte del programa ‘Autores nel camín’ qu’entama la Conseyería de Cultura Política Llingüística y Turismu p’averar a los ciudadanos del país a los ganadores de los sos Premios Lliterarios del 2019 y 2020 al traviés de los conceyos, que tamién facilita la presencia de Xune Elipe’l día siguiente nesi mesmu llugar a les 19 hores pa poner per primer vegada la conferencia ‘Hai una llinia trazada...’.

Nella’l cantante de Dixebra, ganador del XXVI Premiu Máximo Fuertes Acevedo d’ensayu por ‘Hai una llinia trazada. Historia de la música asturiana’, va facer un percorríu pela historia de la música d’espresión asturiana dende l’antigüedá hasta anguaño. Va ser emplegando un formatu cronolóxicu, mui dinámicu, apoyándose en materiales audiovisuales pa facela más entretenida al espectador.

Pa participar en toes estes actividaes ye necesario acutar plaza contautando nel teléfonu 985.70.00.04 o nel corréu electrónicu adl@bimenes.es.