Bimenes esixe soluciones al Gobiernu pola piscina y demanda inversiones

|
Bimenes esixe soluciones al Gobiernu pola piscina y demanda inversiones

L'alcalde Aitor García Corte aconceyó col conseyeru Guillermo Martínez.

"La xente de Bimenes ta sufriendo les consecuencias de decisiones de les que nun tien culpa y l'alministración llocal ta faciendo auténticos milagros pa poder salvar la situación y caltener los servicios que tenemos, amás d'amortizar el creitu pola sentencia de la piscina y disminuir la deuda contrayida cola Comarca de la Sidra, de la que pagamos esti añu la friolera de 120.000 euros", esplicó tres la reunión García Corte. La mesma tuvo dedicada a la situación económica del conceyu yerbatu y, sobre manera, a la sentencia de la piscina que ta afeutando la capacidá de maniobra del ayuntamientu.

En total, el Conceyu de Bimenes tuvo que solicitar un creitu pa saldar los 424.097 euros que debía abonar por una sentencia xudicial a la empresa qu'anició les obres de la instalación y que deberíen d'abonase a cuenta de los fondos mineros. "Recordé-y que con quién mantenemos el contenciosu y quién incumplió'l conveniu ye'l Principáu y ye por ello polo que-y pidimos cuentes al Gobiernu autonómicu y soluciones", afirma'l primer edil, que tamién treslladó a Martínez la necesidá d'actuaciones sobre la estructura pa evitar el so deterioru y poder aprovechala cuando fine'l contenciosu. D'igual forma, l'asturianista apunta que Bimenes tamién tien pendientes más convenios de los fondos mineros, como ye'l casu de la Casa Cultura, "600.000 euros y na que l'Ayuntamientu yá gastó en proyeutos más de 30.000, amás de que presenta un estáu llamentable".

La situación de la escuela de 0 a 3 años

Otru de los asuntos que García Corte treslladó a Martínez ye'l de la escuela a 0-3 años, que califica de "pataca caliente" pal conceyu. "A nós nun nos quiten profesoráu, aconseyennos aumentar la plantiya, pero claro… Hai que tener en cuenta que Bimenes tien una financiación distinta al restu d'escueles infantiles polo que, en lugar de ser financiada nel porcentaxe de dos tercios, yelo namái un terciu, polo que la nuesa escuela ye deficitaria en 60.000 euros, una cantidá imposible d'asumir pal conceyu y polo que tamos estudiando el zarru de la escuela, qu'agora mesmo tien un gran númberu de neños matriculaos, con una ventena d'alumnos almitíos", esplica.

El Centru Social de Martimporra, "otru de los edificios que nun hai manera d'echar a funcionar", y l'estáu AS-324, en males condiciones nel so pasu por Suares, tamién foron puestos enriba de la mesa por García Corte, que denuncia al Gobiernu que "nun año que llevamos el nuevo gobiernu, nun s'invirtió nin un sólo euru n'infraestructura nin conservaciones". El conseyeru de Presidencia y Participación Ciudadana amosóse, en pallabres del alcalde, collaborativu, y comprometióse a estudiar tolos asuntos. Sicasí, García Corte ta dispuestu a entamar movilizaciones na seronda en casu de nun algamar respuestes y soluciones.

Na semeya, Martínez y García Corte.

 

 

 

 

 

Contador Estadistiques