Bimenes convoca’l XVI Concursu de Cuentos pola Oficialidá del Asturianu

Les persones interesaes en participar nel XVI Concursu de Cuentos pola Oficialidá del Asturianu de Bimenes yá pueden unviar les sos creaciones. El plazu pa presentar trabayos, qu’han de tener un máximo de 10 páxines, fina’l 31 de mayu.

El conceyu yerbatu caltién esti concursu pese a qu’esti añu nun va contar col sofitu de la Conseyería d’Educación, Cultura y Deporte, por mor de los recortes a les subvenciones a la promoción del idioma del país, nin col de la Obra Social y Cultural de Caxastur. Según establecen les bases de participación, tolos rellatos que se presenten al premiu –ún por persona– han de ser inéditos y deben tar redactaos en llingua asturiana, respetando les normes ortográfiques vixentes. Éstos nun deben esceder les diez fueyes, mecanografiaes a doble espaciu per una cara, según marquen les bases del concursu. Los participantes han de presentar un orixinal del cuentu, trés copies del mesmu y otra más en CD baxo un nomatu que debe apaecer nuna plica con tolos datos personales y un currículu con semeya.

Un xuráu formáu por trés persones cualificaes y presidíu pol alcalde de Bimenes, Alejandro Canteli, va decidir el ganador del concursu, que va llevase 600 euros. El segundu y el tercer clasificáu tamién van llograr una recompensa de 450 y 300 euros, de manera respeutiva. L’apertura de pliques va tener llugar el 3 de xunetu y la entrega de premios va celebrase el 12 d’esi mesmu mes nun actu de calter lliterariu.

Los interesaos en participar nel XVI Concursu de Cuentos pola Oficialidá de Bimenes han d’unviar la so creación nun sobre al Conceyu de Bimenes –faciendo referencia al concursu– na direición Martimporra, s/n, códigu postal 33527 (Bimenes). En casu de duldes sobre’l funcionamientu del certame, la organización pon a disposición de los concursantes un teléfonu: el 985.700.004. Na edición del añu pasáu, el ganador d’esti concursu foi Héctor Pérez Iglesias cola obra ‘Puertes abiertes’. Mentes, el segundu premiu llevólu Rubén d’Areñes, con ‘Les faroles pinten della lluz na cai’, y el terceru, Quique Faes Díez con ‘Eme de maldá’.