Bimenes convoca’l XIV Concursu de Cuentos pola Oficialidá

Yá ta abiertu’l plazu pa la presentación de trabayos pal XIV Concursu de Cuentos pola Oficialidá qu’entama’l Conceyu de Bimenes. Los interesaos tienen hasta’l 1 de xunu pa unviar les sos obres.
 
Tolos rellatos han de ser inéditos y deben tar redactaos en llingua asturiana respetando les normes ortográfiques vixentes. Éstos nun deben esceder les 10 fueyes, mecanografiaes a doble espaciu per una cara, según marquen les bases del concursu. Los participantes han de presentar un orixinal del cuentu, tres copies del mesmu y otra más en CD baxo un nomatu que debe apaecer nuna plica con tolos datos personales y un currículu con semeya.
 
Un xuráu formáu tres persones cualificaes y presidíu pol alcalde de Bimenes, José Emilio González, va decidir el ganador del concursu, que va llevase 800 euros. El segundu y el tercer clasificáu tamién van llograr una recompensa de 500 y 300 euros. La entrega de premios, como ye vezu, va celebrase na Fiesta de la Oficialidá de la Llingua Asturiana en Bimenes, el 1 de xunetu, y l’autor ganador va facer una llectura pública del so cuentu.
 
Los interesaos en participar nel XIV Concursu de Cuentos pola Oficialidá de Bimenes han d’unviar la so creación nun sobre al Ayuntamientu de Bimenes, faciendo referencia al concursu, na direición Martimporra, s/n, códigu postal 33527 (Bimenes). En casu de duldes sobre’l funcionamientu del certame, la organización pon a disposición de los concursantes un teléfonu: el 985.700.004.
 
Na edición del añu pasáu, el ganador d’esti concursu foi Pablo Rodríguez Medina cola obra ‘Aproveciendo de fraxilidá’. Mentes, el segundu premiu llevólu Ricardo Candás Huerta con ‘Les circunstancies', y el terceru Xuan Carlos Crespos Lanchas con ‘Cazumbre’.