Bimenes acueye la presentación d’un llibru sobre la trayeutoria de la cantante Diamantina Rodríguez

El músicu Xaime Arias ye autor de ‘Diamantina Rodríguez. Memoria de un tiempo de la canción asturiana’. Esta biografía d’una de les meyores voces de la tonada va presentase’l vienres, a les 20 hores, na Casa Cultura de Santuyano.

La obra d’Arias recueye tola trayeutoria de la cantante nacida en Quirós y residente anguaño en Mieres nesti trabayu asoleyáu pola editorial La Cruz de Grado que tien el so orixe nun trabayu d’investigación fechu na universidá. Nél pretende dar a conocer, a partir de la obra de Diamantina, el tiempu nel que se desendolca la tonada asturiana pa voz femenina y la so repercusión anguaño. Nel actu de mañana en Bimenes va tar presente la propia Diamantina, amás d’Arias y d’Orfelina Pandiella, presidenta de l’Asociación Folklórica y Cultural Los Yerbatos, y del editor César Santiago.

Esti llibru fai’l númberu 30 de la editorial moscona, nacida n’avientu del añu 2007. Amás d’esta obra dedicada a Diamantina Rodríguez, La Cruz de Grado ta acabante de zarrar el primer proyeutu n’asturianu ensin subvención del 2013. Trátase d’una obra d’Antón Caamaño de nome ‘Analís de les formes etnodramátiques asturianes y de la so función social n'actualidá’.

Noticiariu de Bimenes

Dellos coleutivos de Bimenes punxeron en marcha, al traviés de la rede social Facebook, ‘Noticiariu de Bimenes’, un tableru d’anuncies que pretende axuntar toles noticies del conceyu. Ésti, escritu na mayor parte en llingua asturiana, cuenta con una collaboración importante de los vecinos.