Bimenes abre la campaña #quelaponganelbalcon p'amosar el compromisu de los conceyos pa cola oficialidá

La pancarta 'Conceyos pola Oficialidá' lluz na Casa Conceyu de Bimenes dende'l vienres dientro de la campaña #quelaponganelbalcon que pretende amosar el compromisu de los ayuntamientos asturianos pa cola oficialidá del idioma. Grau y Morcín van ser los siguientes en colingala.

Asina lo confirmó la Xunta pola Defensa de la Llingua Asturiana, que sigue trabayando nesta campaña que nun para de sumar apoyos. "Yá firmaron la carta unos cien cargos de 33 conceyos" cola incorporación d'Ibias y Cuideiru, apunta'l so voceru nacional, satisfechu cola respuesta de los ediles con vistes a sofitar la declaración d'oficialidá prevista en Bimenes pal 2 de xunetu y avanzar nel compromisu de los conceyos nel algame d'esti derechu básicu.

Tres colingar la pancarta na Casa Conceyu yerbata, la pancarta va entamar una xira per dellos ayuntamientos asturianos. Los primeros en solicitar la so participación en #quelaponganelbalcon son Grau y Morcín, cola posibilidá de llucila en dalgún d'éstos dos ayuntamientos a últimos d'esta mesma selmana.

"La Xunta pola Defensa de la Llingua Asturiana y el Conceyu de Bimenes cuenten con llegar agora a tolos conceyos pa entamar aína les conversaciones que de xuru van permitir la formulación d’aiciones y posicionamientos políticos conxuntos. De ser asina los resultaos faríense públicos na Fiesta de la Oficialidá y llevaríense a la práctica enantes d’acabar la lexislatura", apunten dende la organización cívica.