Bienestar Social y Vivienda tendrá 324,8 millones pa “dar respuestes” a les families afeutaes pola crisis

Esther Díaz, conseyera de Bienestar Social y Vivienda, detalló esti miércoles les cuentes del so departamentu pal 2013. Dispondrá de 324,8 millones pa “dar respuestes a les miles de families asturianes que tán xugandose'l so proyeutu vital”.

La ex alcaldesa de Llangréu resaltó na so comparecencia énte la Comisión de Facienda de la Xunta Xeneral que l'atención a persones dependientes queda garantizada con 51 millones d'euros, de los que 30 van destinase a cuidadores, 10 a prestaciones de servicios y 11 a teleasistencia y atención a casa. D’igual forma, calcó nel Salariu Social, que va disponer d'una partida de 46 millones d'euros, siendo'l 2013 el primer añu nel que la cuantía prevista iguálase a la execución del añu anterior, depués de que nel 2012 hubiera qu'aumentar la mesma en más de diez millones p'atender a la demanda creciente.

Díaz tamién remarcó la xuba de mediu millón d'euros na partida del Plan Alcordáu de Servicios Sociales Básicos, que llega hasta los 26,67 millones. Del montante global, va destinase un millón d'euros al plan d'incorporación llaboral de beneficiarios del salariu social. Díaz apuntó, de la mesma, que la dotación pa discapacidá y centros d'apoyu a la integración ye de 14 millones, y de 6,76 millones pa infancia. Tamién van destinase 30 millones pa places, tanto públiques como privaes, pa l'atención a les persones con dalgún tipu de discapacidá.

L'alcuerdu marcu d'infancia va contar con una cantidá adicional de 565 places, xubiendo a un total de 792, y van caltenese los convenios con conceyos pal mantenimientu d'equipos téunicos d'intervención familiar y los puntos d'alcuentru familiar. Los programes de proteición y acoyimientu van rexistrar una xubida del 20 por cientu al respeuto de les convocatories del 2012, pasando a 1,63 millones d'euros. Nel área de mayores, los centros de día van tener una partida de 7,45 millones d'euros y la rede d'Establecimientos Residenciales pa Mayores d'Asturies (ERA) va contar con un presupuestu de 108,94 millones, cola previsión d'abertura pal añu qu'entra de les residencies de Morea, El Nodo (Avilés) y Castrillón.

Tocantes a l'Axencia de Cooperación al Desarrollu, la conseyera esplicó que la partida prevista pal 2013 va quedar en 5,78 millones d'euros, un 10,4 por cientu menos que nel presupuestu executáu esti añu.

Prioridá a les obres yá entamaes

La Direición Xeneral de Vivienda va dar prioridá a la conclusión d'obres entamaes, como les 114 viviendes de La Madalena (Avilés) y les 15 d'El Ribazo (Navia), que van axudicase a primeros del 2013. Amás, prográmense actuaciones de rehabilitación y arreglu d'edificios por importe de 600.000 euros; va utilizase gran parte de los garaxes de viviendes, esti añu ensin esplotar; van destinase 300.000 euros al proyeutu pa la rehabilitación de les viviendes del barriu de Pumarabule, en Siero; y van destinase 12,2 millones a pagos d'ayudes pal accesu a la vivienda concedíes n'años anteriores, les ayudes al alquiler convocaes nel 2012 y les nueves convocatories del próximu añu.